ആറു വര്‍ഷത്തിന് ശേഷം ഖത്തര്‍ - ബഹ്‌റൈന്‍ വിമാന സര്‍വിസ് പുനരാരംഭിക്കുന്നു

ദോഹ: ഉപരോധത്തിനു പിന്നാലെ 2017ല്‍ നിര്‍ത്തിവച്ച ഖത്തര്‍ ബഹ്‌റൈന്‍ വിമാന സര്‍വിസുകള്‍ ആറ് വര്‍ഷങ്ങള്‍ക്കിപ്പുറം പുനരാരംഭിക്കുന്നു. ഈ മാസം 25 മുതല്‍ മേഖലയില്‍ വിമാനങ്ങള്‍ പറന്നുതുടങ്ങും. ബഹ്‌റൈന്‍ സിവില്‍ ഏവിയേഷന്‍ അഫയേഴ്‌സ് തിങ്കളാഴ്ചയാണ് പ്രഖ്യാപനം നടത്തിയത്. റിയാദില്‍ ഗള്‍ഫ് കോപറേഷന്‍ കൗണ്‍സില്‍ (ജി.സി.സി) ആസ്ഥാനത്ത് ഏപ്രില്‍ 12ന് നടന്ന കൂടിക്കാഴ്ചയിലാണ് ഇരുരാജ്യങ്ങളിലെയും പ്രതിനിധികള്‍ ബന്ധം പുനഃസ്ഥാപിക്കുമെന്ന് പ്രഖ്യാപിച്ചത്. അല്‍ ഉല കരാറിന് ശേഷം സൗദിയുമായും യു.എ.ഇയുമായും ഖത്തര്‍ ബന്ധം പുനഃസ്ഥാപിച്ചെങ്കിലും ബഹ്‌റൈനുമായി അടുത്തിരുന്നില്ല. ഇരുരാജ്യങ്ങളും തമ്മില്‍ തര്‍ക്കങ്ങള്‍ നിലനിന്നതാണ് ഇതിനു കാരണം.