വല്ലപ്പുഴ: അടിസ്ഥാന സൗകര്യങ്ങളില്ലാതെ വല്ലപ്പുഴയിലെ ലക്ഷംവീട് കോളനി. ടാര്‍പോളിന്‍ കെട്ടിമറച്ച മേല്‍ക്കൂര, വിള്ളല്‍വീണ ഭിത്തികള്‍, ഏതുസമയവും നിലംപൊത്താറായ അവസ്ഥയിലാണ് വല്ലപ്പുഴ പഞ്ചായത്തിലെ ചൂരക്കോട് ലക്ഷംവീട് കോളനിയിലെ വീടുകള്‍. ശക്തമായ കാറ്റോ മഴയോ വന്നാല്‍ ഉറങ്ങാതെ കുടചൂടി വീട്ടിനുള്ളില്‍ കുടചൂടി നില്‍ക്കേണ്ട ഗതികേടിലാണ് കോളനിവാസികള്‍.
ഇഴജന്തുക്കളെ പേടിച്ച് കുട്ടികളും സ്ത്രീകളുമടങ്ങുന്ന ഇരുപതോളം കുടുംബങ്ങളാണ് ഈ കോളനിയില്‍ ദുരിതമനുഭവിക്കുന്നത്.
കുടിവെള്ളം പോലും ചിലസമയങ്ങളില്‍ കിട്ടാക്കനിയാണ്. പ്രാഥമികാവശ്യങ്ങള്‍ നിറവേറ്റാന്‍ പോലും ബുദ്ധിമുട്ടുന്നു. നിയമത്തിന്റെ നൂലാമാലകളില്‍പെട്ട് പലപ്പോഴും വേണ്ടത്ര സഹായങ്ങള്‍ അധികൃതരില്‍ നിന്ന് ലഭിക്കാറുമില്ല. കോളനിയിലെ വീടുകള്‍ അറ്റകുറ്റപ്പണികള്‍ നടത്തി വാസയോഗ്യമാക്കണമന്ന ആവശ്യം ശക്തമായി വരികയാണ്.
 വൃദ്ധരും രോഗികളുമടങ്ങുന്ന കോളനി കുടുംബങ്ങള്‍ വളരെ ഭീതിയിലാണ് കഴിയുന്നതെന്നും അതിനാല്‍ ഗ്രാമപഞ്ചായത്ത് ഭരണസമിതി ഇടപെട്ട് ഇവരുടെ ദുരിതത്തിന് പരിഹാരം കാണണമെന്നും യൂത്ത് കോണ്‍ഗ്രസ് മണ്ഡലം പ്രസിഡന്റ് പി.കെ.എ റസാഖ് ആവശ്യപ്പെട്ടു.