കൊല്‍ക്കത്ത: ബംഗാളില്‍ ബി.ജെ.പിയില്‍നിന്ന് തൃണമൂലിലേക്കുള്ള ഒഴുക്ക് തുടരുന്നു. പാര്‍ട്ടി വിട്ട് ബി.ജെ.പിയില്‍ ചേര്‍ന്നതിന് മാപ്പുപറഞ്ഞും പ്രായശ്ചിത്തം ചെയ്തും ഗംഗാജലം കൊണ്ട് ദേഹശുദ്ധി വരുത്തിയുമെല്ലാമാണ് പലയിടത്തും പ്രവര്‍ത്തകരുടെ 'ഘര്‍വാപസി'. അവസാനമായി ബിര്‍ഭൂമില്‍ 150 ബി.ജെ.പി പ്രവര്‍ത്തകര്‍ കൂടി തൃണമൂല്‍ കോണ്‍ഗ്രസില്‍ ചേര്‍ന്നിരിക്കുകയാണ്.

എന്നാല്‍, ഇത്തവണ കൗതുകകരമായ രീതിയിലായിരുന്നു പ്രവര്‍ത്തകരുടെ പ്രായശ്ചിത്തം. 'ബി.ജെ.പി വൈറസി'നെതിരെ എന്നു പറഞ്ഞ് കൂട്ടത്തോടെ സാനിറ്റൈസര്‍ തളിച്ചായിരുന്നു ഇവര്‍ തൃണമൂലിലേക്ക് മടങ്ങിയത്. നൂറുണക്കിനു പ്രവര്‍ത്തകര്‍ വരിവരിയായി നില്‍ക്കുകയും നേതാക്കന്മാര്‍ സാനിറ്റൈസര്‍ അടിക്കുകയും ചെയ്യുന്നതിന്റെ വിഡിയോ സമൂഹമാധ്യമങ്ങളില്‍ പ്രചരിക്കുന്നുണ്ട്.

ബിര്‍ഭൂമിലെ ഇലംബസാര്‍ ബ്ലോക്കിലാണ് സംഭവം. ബിര്‍ഭൂമില്‍ നടന്ന പാര്‍ട്ടി പരിപാടിയില്‍ വച്ചായിരുന്നു തൃണമൂല്‍ നേതാക്കള്‍ മുന്‍പ്രവര്‍ത്തകരെ സാനിറ്റൈസര്‍ തളിച്ച് സ്വീകരിച്ചത്. ബി.ജെ.പി വൈറസ് ശരീരത്തിലുള്ളതു കാരണമാണ് സാനിറ്റൈസര്‍കൊണ്ട് ശുദ്ധീകരണം നടത്തിയതെന്ന് ഒരു പ്രാദേശിക തൃണമൂല്‍ നേതാവ് പ്രതികരിച്ചു.

കഴിഞ്ഞ ദിവസം ഹൂഗ്ലി ജില്ലയില്‍ 200ഓളം ബിജെപി പ്രവര്‍ത്തകര്‍ തൃണമൂലില്‍ തിരിച്ചെത്തിയിരുന്നു. തല മുണ്ഡനം ചെയ്തും ഗംഗാജലം തളിച്ചുമായിരുന്നു ഇവരുടെ പ്രായശ്ചിത്തം. തൃണമൂല്‍ എംപി അപാരുപ പോഡാറിന്റെ നേതൃത്വത്തിലായിരുന്നു ഈ ചടങ്ങ് നടന്നത്.