നാദാപുരം: നാദാപുരത്ത് യൂത്ത് ലീഗ് പ്രവര്‍ത്തകന്‍ കാളിയപറമ്പത്ത് അസ്‌ലമിനെ വെട്ടിക്കൊലപ്പെടുത്തിയ കേസില്‍ ഒരാള്‍ അറസ്റ്റില്‍. കുട്ടു എന്ന നിഥിനാണ് അറസ്റ്റിലായത്. ഇയാളാണ് പ്രതികള്‍ക്ക് ഇന്നോവ കാര്‍ നല്‍കിയതെന്ന് പൊലിസ് അറിയിച്ചു. അറസ്റ്റ് സംബന്ധിച്ച കൂടുതല്‍ വിവരം പൊലിസ് പുറത്തുവിട്ടിട്ടില്ല.

ആഗസ്ത് 11നാണ് അസ്‌ലം വെട്ടേറ്റു മരിക്കുന്നത്. തൂണേരി വെള്ളൂരില്‍ ഡി.വൈ.എഫ്.ഐ പ്രവര്‍ത്തകന്‍ ഷിബിനെ കൊലപ്പെടുത്തിയ കേസില്‍ അസ്‌ലമിനെ കോടതി വെറുതെ വിട്ടിരുന്നു. ഇതിന് പ്രതികാരമെന്നോണമാണ് അസ്‌ലമിനെ പ്രതികള്‍ അക്രമിച്ച് വെട്ടിക്കൊലപ്പെടുത്തിയതെന്നാണ് പൊലിസ് ഭാഷ്യം. പ്രതികള്‍ ആക്രമത്തിനു ശേഷം കാറില്‍ കടന്നുകളഞ്ഞു.

അക്രമികള്‍ സഞ്ചരിച്ച ഇന്നോവ കാര്‍ കോഴിക്കോട് ബേപ്പൂര്‍ സ്വദേശി രണ്ടു വര്‍ഷം മുന്‍പ് മറിച്ചുവിറ്റതാണെന്ന് അന്വേഷണത്തില്‍ പൊലിസ് കണ്ടെത്തയിരുന്നു.