കൊടുവള്ളിയില്‍ മിന്നലേറ്റ് യുവാവ് മരിച്ചു

കോഴിക്കോട്: കൊടുവള്ളി കിഴക്കോത്ത് യുവാവ് മിന്നലേറ്റ് മരിച്ചു. ഒപ്പമുണ്ടായിരുന്ന രണ്ടുപേര്‍ക്കു പരുക്കേറ്റു. ഇവരുടെ പരുക്ക് സാരമുള്ളതല്ല. കൊടുവള്ളിയിലെ കക്കോടന്‍ നസീര്‍ ആണ് മരിച്ചത്. ഇന്ന് ഉച്ചക്കായിരുന്നു സംഭവം.

സ്ഥലക്കച്ചവടവുമായി ബന്ധപ്പെട്ട് കൊടുവള്ളി കിഴക്കോത്ത് എത്തിയതായിരുന്നു ഇവര്‍. ഉടനെ കൊടുവള്ളിയിലെ സ്വകാര്യ ആശുപത്രിയില്‍ പ്രവേശിപ്പിച്ചുവെങ്കിലും സ്ഥിതി വഷളായതോടെ കോഴിക്കോട് മെഡിക്കല്‍ കോളജ് ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരണം സംഭവിച്ചു.