തരുവണ: ടൗണിലെ അനധികൃത മാലിന്യ നിക്ഷേപം നാട്ടുകാര്‍ക്ക് വിനയാകുന്നു. തരവണ ടൗണിലെ കാലപ്പഴക്കം ചെന്ന കെട്ടിടം പൊളിച്ച മാറ്റിയ സ്ഥലത്താണ് മാലിന്യം കുന്ന് കൂടിയിരിക്കുന്നത്.
 ടൗണിലെ മാലിന്യവും മറ്റു സ്ഥലങ്ങളിലെ മാലിന്യവും ഇവിടെ തള്ളുന്നുണ്ടെന്നാണ് നാട്ടുകാരുടെ ആരോപണം. രാത്രികാലങ്ങളിലാണ് മാലിന്യം നിക്ഷേപിക്കുന്നത്. മാലിന്യം കുന്നുകൂടിയതോടെ ദുര്‍ഗന്ധവും തുടങ്ങിയിട്ടുണ്ട്. ഇതോടെ ഇതിന് സമീപത്തായി ബസ് കാത്തുനില്‍ക്കുന്ന വിദ്യാര്‍ഥികളുള്‍പെടെയുള്ളവര്‍ ദുരിതത്തിലായിരിക്കുകയാണ്. മുന്‍പ് പഞ്ചായത്തിന്റെ നേതൃത്വത്തില്‍ ടൗണ്‍ ശുചീകരണം നടന്നിരുന്നു. എന്നാല്‍ ശേഖരിക്കുന്ന മാലിന്യം നിക്ഷേപിക്കാനിടമില്ലാതായതോടെ ഇതും നിലക്കുകയായിരുന്നു. ടൗണിലെ അനധികൃത മാലിന്യ നിക്ഷേപത്തിനെതിരേ നടപടിയെടുക്കണമെന്നും അനുയോജ്യമായ സ്ഥലം കണ്ടെത്തി മാലിന്യം സംസ്‌കരിക്കണമെന്നുമാണ് നാട്ടുകാരുടെ ആവശ്യം.