ഇരുചക്ര വാഹന വിപണിയില്‍ മികച്ച കുതിപ്പ് നടത്തുകയാണ് ഇന്ത്യന്‍ മാര്‍ക്കറ്റ്. പ്രത്യേകിച്ചും ഇലക്ട്രിക്ക് വാഹനങ്ങള്‍ക്ക് വലിയ ഡിമാന്‍ഡാണ് ഇന്ത്യന്‍ വിപണിയിലുളളത്. ഇക്കാര്യം കൊണ്ട് തന്നെ പല വാഹന നിര്‍മാതാക്കളും ഇ.വി നിര്‍മ്മാണത്തിലേക്ക് കടന്നിട്ടുണ്ട്. അതിനൊപ്പം തന്നെ നിരവധി സ്റ്റാര്‍ട്ട് അപ്പ് കമ്പനികളും ഇ.വി വാഹന വിപണിയിലേ ഈ ഉയര്‍ന്ന ഡിമാന്‍ഡ് കണക്കിലെടുത്ത് വിപണിയില്‍ സജീവമാകുന്നുണ്ട്.

ഇപ്പോള്‍ ഡല്‍ഹി കേന്ദ്രീകരിച്ച് പ്രവര്‍ത്തിക്കുന്ന mxmoto ഒരു ഹൈ സ്പീഡ് ഇലക്ട്രിക്ക് ബൈക്ക് മാര്‍ക്കറ്റിലേക്കെത്തിക്കാനുളള തയ്യാറെടുപ്പിലാണ്. ജൂലൈ മാസത്തിലാണ് mx9 എന്നറിയപ്പെടുന്ന ഈ ബൈക്ക് വിപണിയിലേക്കെത്തിക്കുന്നത്. ബൈക്കിന്റെ കൂടുതല്‍ വിശദാംശങ്ങളൊന്നും പുറത്ത് വന്നിട്ടില്ല. യൂറോപ്പില്‍ നിന്നുളള പ്രമുഖ ഡിസൈനറും ക്രിയേറ്ററുമായ മാര്‍സെല്ലോ സില്‍വയാണ് പ്രസ്തുത ബൈക്ക് ഡിസൈന്‍ ചെയ്തിരിക്കുന്നത്.

mXmoto ഇലക്ട്രിക് ബൈക്കില്‍ സജ്ജീകരിച്ചിരിക്കുന്ന 17 ഇഞ്ച് വലിയ വീലുകളും 60 AMP കണ്‍ട്രോളറും റീജനറേറ്റീവ് ബ്രേക്കിംഗ് സിസ്റ്റവുമെല്ലാം ഹൈ ലെവല്‍ സേഫറ്റി വാഗ്ദാനം ചെയ്യുന്നതായാണ് കമ്പനി അവകാശപ്പെടുന്നത്. ഒപ്പം തന്നെ ഔട്ട്പുട്ട് പവറില്‍ 16% വര്‍ധനവ് നല്‍കാനും ഡ്രൈവിംഗ് സിസ്റ്റത്തെ ഉത്തേജിപ്പിക്കാനും ഇത് സഹായിക്കുന്നു.

പ്രതിവര്‍ഷം 3000 മുതല്‍ 4000 വരെ ഇലക്ട്രിക്ക് വാഹനങ്ങള്‍ നിര്‍മ്മിക്കാന്‍ ശേഷിയുളള ഗുരുഗ്രാമിലെ പ്ലാന്റില്‍ വെച്ചാണ് കമ്പനി വാഹനങ്ങള്‍ നിര്‍മ്മിക്കുന്നത്.ഹൈ പെര്‍ഫോമന്‍സ് ഇലക്ട്രിക് വാഹനങ്ങള്‍ മിതമായ നിരക്കില്‍ ജനങ്ങള്‍ക്ക് എളുപ്പത്തില്‍ ലഭ്യമാക്കുക എന്നതാണ് തങ്ങളുടെ ലക്ഷ്യമെന്ന mXmoto മാനേജിംഗ് ഡയറക്ടര്‍ രാജേന്ദ്ര മല്‍ഹോത്ര പറഞ്ഞു.

Content Highlights:mxmoto teased mx9 high speed electric bike launch in july