പെട്രോൾ വില കുറഞ്ഞു; ഓഗസ്റ്റ് മാസത്തെ ഇന്ധന വില പ്രഖ്യാപിച്ച് ഖത്തർ

ദോഹ: ഓഗസ്റ്റ് മാസത്തെ ഇന്ധന വില പ്രഖ്യാപിച്ച് ഖത്തർ എനർജി. ഡീസൽ, സൂപ്പർ പെട്രോൾ വിലയിൽ മാറ്റമില്ല. പ്രീമിയം പെട്രോൾ വില കുറഞ്ഞു. പുതുക്കിയ വില ഇന്നലെ മുതൽ പ്രാബല്യത്തിൽ വന്നു.

ഖത്തർ എനർജിയുടെ അറിയിപ്പ് പ്രകാരം ഒരു ലിറ്റർ ഡീസൽ വില 2.05 ഖത്തർ റിയാലായി തുടരും. സൂപ്പർ പെട്രോളിന് 2.10 റിയാൽ ആണ് ലിറ്റർ വില.

പ്രീമിയം പെട്രോളിന്റെ വിലയിൽ 5 ദിർഹം കുറവ് രേഖപ്പെടുത്തി. കഴിഞ്ഞ മാസം 1.95 റിയാൽ ആയിരുന്നതാണ് 5 ദിർഹം കുറച്ചത്. 1.90 റിയാലാണ് പ്രീമിയം പെട്രോളിന്റെ പുതുക്കിയ വില.

ഒരു വർഷത്തിലധികമായി പെട്രോൾ സൂപ്പർ ഗ്രേഡിനും ഡീസലിനും വിലയിൽ മാറ്റമില്ലാതെ തുടരുകയാണ്. ആഗോള എണ്ണ വിപണിയിലെ വില പ്രകാരമാണ് എല്ലാമാസവും ഇന്ധനവില പുതുക്കുന്നത്. ഇതുപ്രകാരം യുഎഇയിൽ ഈ മാസം ഇന്ധന വിലയിൽ വർധന രേഖപ്പെടുത്തിയിരുന്നു.