രാഹുല്‍ ഫ്ലയിങ് കിസ് നല്‍കിയെന്ന ആരോപണവുമായി സ്മൃതി ഇറാനി; വനിതാ എം.പിമാര്‍ പരാതി നല്‍കി

ന്യൂഡല്‍ഹി: പാര്‍ലമെന്റില്‍ മണിപ്പൂര്‍ വിഷയത്തില്‍ പ്രതിപക്ഷം കൊണ്ടുവന്ന അവിശ്വാസ പ്രമേയ ചര്‍ച്ചയില്‍, പ്രസംഗം കഴിഞ്ഞതിനു പിന്നാലെ, കോണ്‍ഗ്രസ് എം.പി രാഹുല്‍ഗാന്ധി വനിതാ അംഗങ്ങള്‍ക്ക് നേരെ ഫ്ലയിങ് കിസ് നല്‍കിയെന്ന് പരാതി. രാഹുലിന് ശേഷം പ്രസംഗിച്ച കേന്ദ്രമന്ത്രി സ്മൃതി ഇറാനിയാണ് പരാതിയുമായി രംഗത്തെത്തിയത്. ബി.ജെ.പി വനിതാ എം.പിമാര്‍ ലോക്‌സഭാ സ്പീക്കര്‍ ഓം ബിര്‍ളയ്ക്ക് പരാതി നല്‍കുമെന്നാണ് വിവരം.

സ്ത്രീവിരുദ്ധനായ ഒരാള്‍ക്ക് മാത്രമേ ഇത്തരത്തില്‍ ഇത്തരത്തില്‍ പ്രതികരിക്കാന്‍ കഴിയൂവെന്ന് അവര്‍ പറഞ്ഞു. രാഹുലിന്റെ പേര് പരാമര്‍ശിക്കാതെയാണ് സ്മൃതി ഇറാനിയുടെ പരാമര്‍ശം.

''എനിക്ക് മുന്‍പ് സംസാരിച്ചയാള്‍ മോശമായി പെരുമാറി. സ്ത്രീ വിരുദ്ധനായ ആള്‍ക്കുമാത്രമേ, വനിതാ പാര്‍ലമെന്റംഗങ്ങള്‍ക്കുനേരെ ഫ്ലയിങ് കിസ് കാണിക്കാന്‍ കഴിയൂ. ഇത്തരത്തിലുള്ള മാന്യതയില്ലാത്ത പെരുമാറ്റം പാര്‍ലമെന്റില്‍ മുന്‍പ് കണ്ടിട്ടില്ല''- സ്മൃതി ഇറാനി പറഞ്ഞു.

അതേസമയം, രാഹുല്‍ ഗാന്ധി ഫ്ലയിങ് കിസ് നല്‍കുന്നത് ക്യാമറയില്‍ പതിഞ്ഞിട്ടില്ല.