പ്രശസ്ത മാപ്പിളപ്പാട്ട് ഗായിക വിളയിൽ ഫസീല അന്തരിച്ചു

കോഴിക്കോട്: പ്രശസ്ത മാപ്പിളപ്പാട്ട് ഗായിക വിളയിൽ ഫസീല അന്തരിച്ചു. 63 വയസായിരുന്നു. മാപ്പിളപ്പാട്ടിനെ ജനകീയമാക്കുന്നതിൽ ഏറെ സംഭാവനകൾ നൽകിയ വ്യക്തിയായിരുന്നു വിളയിൽ ഫസീല. അയ്യായിരത്തോളം പാട്ടുകൾ പാടിയിട്ടുണ്ട്.

കോഴിക്കോട് വെള്ളിപറമ്പിലെ വസതിയിലായിരുന്നു അന്ത്യം. ഹൃദയാഘാതത്തെ തുടർന്നായിരുന്നു മരണം സംഭവിച്ചത്.

മലപ്പുറം ഏറനാട് താലൂക്കിലെ മുതുവല്ലൂർ പഞ്ചായത്തിലെ വിളയിലിലാണ് ജനനം. വിളയിൽ വത്സല എന്നായിരുന്നു ആദ്യകാല പേര്. പിന്നീട് ഇവർ ഇസ്‌ലാം മതം സ്വീകരിക്കുകയായിരുന്നു. ഇതിന് ശേഷമാണ് വിളയിൽ ഫസീല എന്ന പേര് സ്വീകരിച്ചത്. മാപ്പിളപ്പാട്ടുകളായിരുന്നു പാടിയവയിൽ ഏറെയും.

മാപ്പിളപ്പാട്ടിന്റെ ജനകീയമാക്കുന്നതിൽ ഇവർ വഹിച്ച പങ്ക് വളരെ വലുതാണ്. പഴയ കാലത്തെ പല പ്രശസ്ത മാപ്പിളപ്പാട്ടുകളും ജനം കേട്ടത് ഫസീലയുടെ മാധുര്യമുള്ള ശബ്ദത്തിലൂടെയായിരുന്നു.

കേരള മാപ്പിള കലാ അക്കാദമി ഏർപ്പെടുത്തിയ ലൈഫ്‌ ടൈം അച്ചീവ്‌മെൻറ് അവാർഡ്‌ ലഭിച്ചിട്ടുണ്ട്.