ചണ്ഡിഗഡ്: ഹിന്ദുക്കൾക്ക് തോക്ക് ലൈസൻസ് നൽകണ ആവശ്യവുമായി ഹിന്ദു മഹാപഞ്ചായത്ത്. വർഗീയ കലാപം നടന്ന ഹരിയാനയിലെ പല്‍വാളില്‍ നടന്ന ഹിന്ദു സംഘടനകളുടെ മഹാപഞ്ചായത്താണ് പ്രകോപന പ്രസ്താവനകളുമായി രംഗത്ത് വന്നത്. ഹിന്ദുക്കൾക്ക് തോക്ക് ലൈസൻസ് നൽകണമെന്നും ഓരോ ഹിന്ദു ഗ്രാമത്തിലും 100 ആയുധങ്ങൾ വീതം നൽകണമെന്നുമാണ് ആവശ്യം. ഞായറാഴ്ചയായിരുന്നു മഹാപഞ്ചായത്ത്.

വിദ്വേഷ പ്രസംഗങ്ങള്‍ ഉണ്ടാവരുതെന്ന നിബന്ധനയോടെയാണ് അ‌ഞ്ഞൂറോളം പേര്‍ക്ക് ഒരുമിച്ച് കൂടാനുള്ള അനുമതി നല്‍കിയത്. എന്നാൽ നിബന്ധന ലംഘിച്ചാണ് പ്രകോപന പ്രസ്താവനകൾ നടത്തിയത്. പല്‍വാളിലെ കിറ ഗ്രാമത്തില്‍ നടത്താന്‍ നിശ്ചയിച്ചിരുന്ന ഹിന്ദു പഞ്ചായത്തിന് ക്രമസമാധാന പ്രശ്നങ്ങള്‍ ചൂണ്ടിക്കാട്ടി പൊലിസ് അനുമതി നിഷേധിച്ചിരുന്നു. തുടര്‍ന്ന് പോണ്ട്രി ഗ്രാമത്തിലാണ് നടത്തിയത്. ഇവിടെയാണ് നിബന്ധനകൾ ലംഘിച്ചത്. എന്നാൽ സംഭവത്തിൽ ഇതുവരെ പൊലിസ് നടപടിയെടുത്തിട്ടില്ല.

ഈ മാസം 28 ന് നൂഹിൽ വീണ്ടും ഘോഷയാത്ര നടത്താനും ഹിന്ദു മഹാ പഞ്ചായത്ത് തീരുമാനമെടുത്തു. നേരത്തെ നടത്തിയ ഒരു ഘോഷയാത്രയാണ് കലാപത്തിന് കാരണമായത്. എന്നാൽ വീണ്ടും ഘോഷയാത്ര നടത്തണമെന്നാണ് തീവ്രഹിന്ദു സംഘടനകളുടെ പഞ്ചായത്തിന്റെ തീരുമാനം.

അതേസമയം, മേവാത്തിൽ നിന്നും പുറത്തു നിന്ന് വന്നവരെ തിരിച്ചയക്കണം എന്ന് ഗൗ രക്ഷക് ദൾ നേതാവ് ആചാര്യ ആസാദ് ശാസ്ത്രി ആവശ്യപ്പെട്ടു. നുഹ് ജില്ലയുടെ ജില്ലാ പദവി റദ്ദാക്കണം എന്നും അദ്ദേഹം ആവശ്യപ്പെട്ടു. നുഹിനെ പല്‍വാള്‍, ഗുരുഗ്രാമം ജില്ലകളുമായി ലയിപ്പിക്കണമെന്നും സംഘര്‍ഷത്തിലെ ഉത്തരവാദികളുടെ വിചാരണ നുഹിന് പുറത്തു വെച്ച് നടത്തണമെന്നു ആവശ്യം ഉന്നയിച്ചു.