സാധാരണ നടക്കുന്ന അഞ്ച് ഓൺലൈൻ തട്ടിപ്പുകൾ സൂക്ഷിക്കണമെന്ന് പൊലിസ്; എങ്ങിനെ സുരക്ഷിതരായിരിക്കാം?

അബുദാബി: ഓൺലൈൻ തട്ടിപ്പുകാർ ഇരകളെ തെറ്റിദ്ധരിപ്പിക്കാൻ ഉപയോഗിക്കുന്ന വിവിധ മാർഗങ്ങളെ കുറിച്ച് അബുദാബി പൊലിസ് താമസക്കാർക്ക് മുന്നറിയിപ്പ് നൽകി. വഞ്ചനാപരമായ കോളുകൾ, വെബ്‌സൈറ്റുകളിലേക്കുള്ള ലിങ്കുകൾ, സർക്കാർ സ്ഥാപനങ്ങളുടെ ആൾമാറാട്ടം, വ്യാജ സേവനങ്ങളും പ്രലോഭനങ്ങളും വാഗ്ദാനം ചെയ്യുന്ന വ്യാജ എസ്എംഎസ് സന്ദേശങ്ങൾ തുടങ്ങിയ തട്ടിപ്പുകൾ വ്യാപകമാകുന്ന സാഹചര്യത്തിലാണ് പൊലിസ് മുന്നറിയിപ്പ്.

പൊതുജനങ്ങൾക്ക് പ്രത്യേക ഓഫറുകൾ വാഗ്‌ദാനം ചെയ്‌ത് പ്രശസ്ത റസ്‌റ്റോറന്റുകളുടെയും ഷോപ്പുകളുടെയും പേരുകൾ ഉപയോഗിച്ച് വ്യാജ ഇന്റർനെറ്റ് സൈറ്റുകൾ ധാരാളമായി പ്രവർത്തിക്കുന്നുണ്ട്. ഇതിലൂടെ വരുന്ന ഓഫറുകളിൽ ക്ലിക്ക് ചെയ്ത് പേയ്‌മെന്റ് അടക്കുമ്പോൾ നിങ്ങളുടെ ക്രെഡിറ്റ് / ഡെബിറ്റ് കാർഡ് ഉൾപ്പെടെയുള്ള വിവരങ്ങൾ നൽകുക വഴി നിങ്ങൾ വഞ്ചിക്കപ്പെട്ടേക്കാം.

വളർത്തുമൃഗങ്ങളെ വിൽക്കുന്നതിനോ ദത്തെടുക്കുന്നതിനോ നൽകുന്ന വ്യാജ ഇലക്ട്രോണിക് പരസ്യങ്ങളുമായി സംവദിക്കരുതെന്നും സോഷ്യൽ മീഡിയ സൈറ്റുകൾ വഴി പരസ്യം ചെയ്യുന്ന എമിറേറ്റിന് പുറത്തുള്ള ഷിപ്പിംഗ്, ഇൻഷുറൻസ് എന്നിവയുമായി സംവദിക്കരുതെന്നും അതോറിറ്റി പൊതുജനങ്ങളോട് നിർദ്ദേശിച്ചു.

അന്തർദേശീയ മണി എക്‌സ്‌ചേഞ്ച് കമ്പനികൾ വഴി പണം കൈമാറ്റം ചെയ്യുന്നതിനായി ബാങ്ക് അക്കൗണ്ടുകളിലേക്ക് പണം അയയ്ക്കാൻ ഇരകളോട് ആവശ്യപ്പെടും. പലപ്പോഴും ഇത് മോഷണമോ തട്ടിപ്പോ ആയിരിക്കും. വിശ്വസ്തരല്ലാത്ത ഇത്തരം വഴികളിലൂടെ പണം അയക്കരുത്.

തൊഴിലന്വേഷകർ ‘വ്യാജ റിക്രൂട്ട്‌മെന്റ്’ പോസ്റ്റ് കെണികളിൽ വീഴരുതെന്ന് അധികൃതർ നിർദേശിക്കുന്നു. തട്ടിപ്പുകാർ പലപ്പോഴും ആളുകളെ കബളിപ്പിക്കാൻ ഔദ്യോഗിക പരിപാടികളും ഇന്റർവ്യൂകളും നടത്തും. റിക്രൂട്ട്‌മെന്റ് ഏജൻസികളെന്ന നിലയിൽ വ്യാജ ഓൺലൈൻ കമ്പനികൾക്കായി പേജുകൾ സൃഷ്‌ടിക്കുകയും ഇത് ഉപയോഗിച്ച് അപേക്ഷാ ഫീസിന്റെ രൂപത്തിൽ അപേക്ഷകരിൽ നിന്ന് പണം തട്ടിയെടുക്കുകയും ചെയ്യുന്നു.

അക്കൗണ്ട് അല്ലെങ്കിൽ കാർഡ് വിവരങ്ങൾ, ഓൺലൈൻ ബാങ്കിംഗ് പാസ്‌വേഡുകൾ, എടിഎം സെക്യൂരിറ്റി നമ്പർ, സിസിവി അല്ലെങ്കിൽ പാസ്‌വേഡ് എന്നിങ്ങനെയുള്ള രഹസ്യ വിവരങ്ങൾ ആരുമായും പങ്കിടരുതെന്ന് പൊതുജനങ്ങളോട് അധികൃതർ അറിയിച്ചു. ബാങ്ക് ജീവനക്കാർ നിങ്ങളോട് ഈ വിവരങ്ങൾ ചോദിക്കില്ല എന്നത് പ്രധാനമാണ്.

അജ്ഞാതരായ ആളുകൾ അവരുടെ ബാങ്കിംഗ് വിശദാംശങ്ങൾ അപ്‌ഡേറ്റ് ചെയ്യാൻ അഭ്യർത്ഥിക്കുന്ന ഏത് കോളുകളും ഉടൻ തന്നെ അടുത്തുള്ള പോലീസ് സ്റ്റേഷനിൽ അറിയിക്കാൻ അബുദാബി പൊലിസ് പൊതുജനങ്ങളോട് ആവശ്യപ്പെട്ടു.

ഈ വഞ്ചനാപരമായ രീതികളെ ചെറുക്കുന്നതിനും സമൂഹത്തെ അപകടങ്ങളിൽ നിന്ന് സംരക്ഷിക്കുന്നതിനുമുള്ള പൊലിസ് ശ്രമങ്ങളെ പിന്തുണയ്ക്കുന്നതിനായി താമസക്കാർക്ക് സുരക്ഷാ സേവന നമ്പറായ 8002626-ലേക്ക് വിളിക്കുകയോ 2828-ലേക്ക് SMS അയയ്‌ക്കുകയോ ചെയ്യാം.