പരീക്ഷാഫലം പ്രസിദ്ധീകരിച്ചില്ല; ഉപരിപഠനം വഴിമുട്ടി പി.ജി വിദ്യാര്‍ഥികള്‍

ഇഖ്ബാല്‍ പാണ്ടികശാല

തേഞ്ഞിപ്പലം: കാലിക്കറ്റ് സര്‍വകലാശാല വിദൂര വിദ്യാഭ്യാസ വിഭാഗത്തിനു കീഴില്‍ 2021ല്‍ പ്രവേശനം നേടിയ പി.ജി വിദ്യാര്‍ഥികളുടെ മൂന്ന് സെമസ്റ്റര്‍ പരീക്ഷാഫലം ഇതുവരെയും പ്രസിദ്ധീകരിച്ചില്ല. ഇവരുടെ നാലാം സെമസ്റ്റര്‍ പരീക്ഷയാകട്ടെ, നടത്തിയിട്ടുമില്ല. പല തവണ ഇക്കാര്യം വിദ്യാര്‍ഥികള്‍ സര്‍വകലാശാല അധികാരികളുടെ ശ്രദ്ധയില്‍പ്പെടുത്തിയിട്ടും പരിഹാരം കണ്ടില്ല. സര്‍വകലാശാലയുടെ ഇത്തരം നടപടികള്‍ ഉപരിപഠനത്തിനും നെറ്റ് പരീക്ഷ എഴുതുന്നവര്‍ക്കും തിരിച്ചടിയായിരിക്കുകയാണ്.

ജനുവരി 30നാണ് ഇവരുടെ ആദ്യ സെമസ്റ്റര്‍ പരീക്ഷ നടത്തിയത്. മാര്‍ച്ച് ഒന്നിന് രണ്ടാം സെമസ്റ്റര്‍ പരീക്ഷയും ജൂണ്‍ ഒന്നിന് മൂന്നാം സെമസ്റ്റര്‍ പരീക്ഷയും സര്‍വകലാശാല നടത്തി. ആറുമാസത്തിനുള്ളിലായിരുന്നു ഈ മൂന്ന് പരീക്ഷയും നടത്തിയിരുന്നത്. ഇവര്‍ക്ക് ശേഷം പരീക്ഷ എഴുതിയ 2022 ബാച്ച് വിദ്യാര്‍ഥികളുടെ പി.ജി സെമസ്റ്റര്‍ പരീക്ഷാഫലങ്ങള്‍ സര്‍വകലാശാല പ്രസിദ്ധീകരിച്ചിട്ടുണ്ട്.

2021 ബാച്ചുകാരുടെ ഉത്തരകടലാസുകള്‍ എവിടെയാണെന്നോ എന്താണ് മൂല്യനിര്‍ണയം നടത്താത്തത് എന്നോ ഒന്നും വ്യക്തമാക്കാന്‍ സര്‍വകലാശാല തയ്യാറാകാത്തത് നൂറുകണക്കിന് വിദ്യാര്‍ഥികളെ ആശങ്കയിലാക്കുന്നു.