വയനാട് വാഹനാപകടം അത്യന്തം ദുഃഖകരം; അനുശോചിച്ച് രാഹുല്‍ ഗാന്ധി

കല്‍പ്പറ്റ: വയനാട് മാനന്തവാടി തലപ്പുഴയില്‍ ജീപ്പ് കൊക്കയിലേക്ക് മറിഞ്ഞ് 9 പേര്‍ മരിച്ച സംഭവത്തില്‍ രാഹുല്‍ ഗാന്ധി എംപി ദുഃഖം രേഖപ്പെടുത്തി. ജില്ലാ ഭരണാധികാരികളുമായി സംസാരിച്ചുവെന്നും വേണ്ട നടപടികള്‍ സ്വീകരിക്കാന്‍ നിര്‍ദേശിച്ചുവെന്നും രാഹുല്‍ ട്വീറ്റ് ചെയ്തു. ഇന്ന് വൈകുന്നേരം 3.45ഓടെയാണ് വയനാട് തലപ്പുഴയില്‍ അപകടമുണ്ടാകുന്നത്. മക്കി മലയില്‍ നിന്ന് സ്വകാര്യ തേയില തോട്ടങ്ങളില്‍ പണിക്ക് പോകുന്ന തൊഴിലാളികള്‍ സഞ്ചരിച്ച ജീപ്പാണ് മറിഞ്ഞത്. വെണ്‍മണി ഭാഗത്തു നിന്നും തലപ്പുഴയില്‍ നിന്ന് വരികയായിരുന്ന ജീപ്പ് കണ്ണോത്ത് മല കയറുന്നതിനിടെ നിയന്ത്രണം വിടുകയായിരുന്നു.

ഗുരുതര പരിക്കുകളോടെ മാനന്തവാടിയിലെ ആശുപത്രിയില്‍ പ്രവേശിപ്പിക്കപ്പെട്ടവരാണ് മരിച്ചത്. ചികിത്സയിലുള്ള 3 പേരുടെ നില ഗുരുതരമാണ്. അതിനാല്‍ തന്നെ മരണസംഖ്യ ഇനിയും ഉയര്‍ന്നേക്കാമെന്നാണ് വിവരം. 14 പേരാണ് ജീപ്പിലുണ്ടായിരുന്നത്. ഇതില്‍ ഡ്രൈവറടക്കം കൊക്കയിലേക്ക് മറിയുകയായിരുന്നു. തൊഴിലാളികള്‍ സ്ഥിരം സഞ്ചരിക്കുന്ന ജീപ്പാണ് മറിഞ്ഞത്. ജോലിക്കായി ഈ വഴിയാണ് ഇവര്‍ പതിവായി പോകുന്നതും. വയനാട് സ്വദേശികളാണ് മരിച്ചവരെല്ലാം