കോഴിക്കോട് • വനിതകളുമായി ബന്ധപ്പെട്ട പരാതികൾക്കായി കോൺഗ്രസിൽ ആഭ്യന്തര പരിഹാര സെൽ രൂപീകരിക്കുമെന്ന ചിന്തൻ ശിബിരം പ്രഖ്യാപനത്തെ ഹർഷാരവത്തോടെ സ്വാഗതം ചെയ്ത് വനിതാ പ്രതിനിധികൾ. തുറന്ന അഭിപ്രായ പ്രകടനത്തിനും ആശയത്തിനും ശിബിരത്തിൽ പരിഗണന ലഭിച്ചെന്നും ആഭ്യന്തര പരിഹാര സെൽ എന്നത് ചരിത്രപരമായ തീരുമാനമാണെന്നും വനിതാ പ്രതിനിധികൾ പറഞ്ഞു.
20 വനിതാ പ്രതിനിധികളാണ് രണ്ടുദിവസത്തെ ചിന്തൻ ശിബിരത്തിൽ പങ്കെടുത്തത്. മുതിർന്ന അംഗമായ മാലേത്ത് സരളാദേവി മുതൽ തൃക്കാക്കരയിൽ തിളക്കമേറിയ വിജയം നേടിയ ഉമ തോമസ് വരെയുള്ളവർ നിലപാടുകളിലും കൂടുതൽ വെളിച്ചവും തെളിച്ചവും പകർന്ന് ശിബിരത്തിൽ സജീവ സാന്നിധ്യമായി.