വടക്കാഞ്ചേരി: വീഥികളെ അമ്പാടിയാക്കി നാടെങ്ങും ശോഭായാത്രകള്‍. ജില്ലയിലെങ്ങും വിവിധ പരിപാടികളോടെ ശ്രീകൃഷ്ണ ജയന്തി ആഘോഷം നടന്നു. ബാലഗോകുലങ്ങളുടെ നേതൃത്വത്തില്‍ വിവിധ സ്ഥലങ്ങള്‍ കേന്ദ്രീകരിച്ച് ശോഭായാത്രകള്‍ നടന്നു.
ഉണ്ണി കണ്ണന്മാര്‍ക്കായി വിവിധ മത്സരങ്ങളും, കലാപരിപാടികളും ഒരുക്കിയിരുന്നു. വടക്കാഞ്ചേരി മേഖലയിലും വര്‍ണാഭമായിരുന്നു പരിപാടികള്‍.
ബാലഗോകുലത്തിന്റെ നേതൃത്വത്തില്‍ കുമരനെല്ലൂര്‍, മേലേമ്പാട്ടുമുക്ക്, ഈഞ്ചലോടി, ഊത്രാളിക്കാവ്, എങ്കക്കാട്, അകമല, ഇരട്ടക്കുളങ്ങര, റെയില്‍വേ സ്റ്റേഷന്‍, എന്നിവിടങ്ങളില്‍ നിന്നുള്ള ശോഭായാത്രകള്‍ വടക്കാഞ്ചേരി കരുമരക്കാട് ക്ഷേത്രത്തിലെത്തി സംഗമിച്ചു.
തുടര്‍ന്ന് വിവിധ കലാപരിപാടികള്‍ നടന്നു. ഇതിന് ശേഷം മഹാശോഭാ യാത്രയും ഉണ്ടായി. മുള്ളൂര്‍ക്കരയില്‍ കാഞ്ഞിരശ്ശേരി, കണ്ണംപാറ, ഇരുന്നിലം കോട്, മുള്ളൂര്‍ക്കര, ബാലഗോകുലങ്ങളുടെ നേതൃത്വത്തിലുള്ള ശോഭാ യാത്രകള്‍ ഇരുന്നിലംകോട് ക്ഷേത്രാങ്കണത്തില്‍ സംഗമിച്ചു. തുടര്‍ന്ന് മുള്ളൂര്‍ക്കര തിരുവാണിക്കാവിലേക്ക് മഹാശോഭായാത്ര നടന്നു. ആറ്റൂര്‍, മണ്ഡലം കുന്ന്, കൊല്ലം മാക്ക്, എടലംകുന്ന്, കാരക്കാട്, തെക്കേക്കര ബാലഗോകുലങ്ങളുടെ നേതൃത്വത്തിലാണ് ശോഭായാത്രകള്‍ നടന്നത്. അഞ്ചുമൂര്‍ത്തി ക്ഷേത്രത്തിലെത്തിയായിരുന്നു സമാപനം.