ദുബൈ: കൊവിഡ് മഹാമാരി മൂലം മാറ്റിവച്ച ദുബൈ മാരത്തണ്‍ വീണ്ടും പുനക്രമീകരിച്ചു. ഖത്തര്‍ ലോകകപ്പ് നടക്കുന്ന പശ്ചാത്തലത്തില്‍ ദുബൈയിലെ ഹോട്ടല്‍ മുറികള്‍ക്കും വിമാനങ്ങള്‍ക്കും ഡിമാന്റ് വര്‍ധിച്ചതോടെയാണ് ഈ വര്‍ഷത്തെ മാരത്തണ്‍ സമയം പുനഃക്രമീകരിച്ചിരിക്കുന്നത്.നേരത്തെ ഈ വര്‍ഷം ഡിസംബറിലാണ് മാരത്തണ്‍ നടത്താന്‍ തീരുമാനിച്ചിരുന്നത്. പുതുക്കിയ സമയക്രമമനുസരിച്ച് 2023 ഫെബ്രുവരി 12 ഞായറാഴ്ചയാണ് മാരത്തണ്‍ നടക്കുക. ദുബൈയിലെ ഏറ്റവും പ്രശസ്തമായ ഓട്ടമത്സരമാണ് ദുബൈ മാരത്തണ്‍. നവംബര്‍ 20 മുതല്‍ ഡിസംബര്‍ 18 വരെ ഖത്തറില്‍ നടക്കുന്ന ഫിഫ ലോകകപ്പിനായി നിരവധി ഫുട്ബോള്‍ പ്രേമികള്‍ ദുബൈയിലും എത്തും. നഗരത്തിലെ ചെലവുകുറഞ്ഞ ഹോട്ടല്‍ താമസസൗകര്യങ്ങള്‍ക്ക് ഡിമാന്റ് വര്‍ധിക്കാന്‍ ഇത് കാരണമായിരിക്കയാണ്.