ന്യൂഡൽഹി • ബലാത്സംഗക്കേസിൽ തനിക്കെതിരേ എഫ്.ഐ.ആർ രജിസ്റ്റർ ചെയ്യണമെന്ന ഡൽഹി ഹൈക്കോടതി ഉത്തരവിനെതിരേ ബി.ജെ.പി നേതാവ് ഷാനവാസ് ഹുസൈൻ സുപ്രിംകോടതിയെ സമീപിച്ചു. കേസ് അടിയന്തരമായി പരിഗണിക്കണമെന്ന് ഷാനവാസ് ഹുസൈന്റെ അഭിഭാഷകൻ മൊഹിത് പോൾ ഇന്നലെ ചീഫ് ജസ്റ്റിസ് എൻ.വി രമണയുടെ ബെഞ്ച് മുമ്പാകെ ആവശ്യപ്പെട്ടു. എഫ്.ഐ.ആർ രജിസ്റ്റർ ചെയ്യുന്നത് 30 വർഷത്തെ രാഷ്ട്രീയ കരിയറുള്ള ഷാനവാസ് ഹുസൈന്റെ സൽപ്പേരിനെ ബാധിക്കുമെന്നാണ് അഭിഭാഷകന്റെ വാദം.
2018 ജൂണിലാണ് ഷാനവാസ് ഹുസൈനെതിരേ ബലാത്സംഗ പരാതിയുയർന്നത്. പൊലിസ് പ്രാഥമികാന്വേഷണം നടത്തിയെങ്കിലും എഫ്.ഐ.ആർ രജിസ്റ്റർ ചെയ്തില്ല. ഇത്തരം കേസുകളിൽ ഇരയുടെ മൊഴി രേഖപ്പെടുത്തുകയും എഫ്.ഐ.ആർ രജിസ്റ്റർ ചെയ്യുകയും വേണമെന്ന് കീഴ്‌ക്കോടതി പൊലിസിനോട് നിർദേശിച്ചിരുന്നു. മതിയായ തെളിവില്ലെന്ന ന്യായത്തിൽ പൊലിസ് അത് പാലിച്ചില്ല. പൊലിസിന് വീഴ്ചപറ്റിയെന്ന് ചൂണ്ടിക്കാട്ടിയാണ് ഡൽഹി ഹൈക്കോടതി ജഡ്ജി ആശാ മേനോൻ എഫ്.ഐ.ആർ രജിസ്റ്റർ ചെയ്യാൻ ഉത്തരവിട്ടത്.
പ്രതികാരബുദ്ധിയാണ് കേസിനാധാരമെന്നും ഷാനവാസ് ഹുസൈന്റെ അഭിഭാഷകൻ വാദിച്ചു. കേസ് അടുത്തയാഴ്ച പരിഗണിക്കാൻ കോടതി തീരുമാനിച്ചു.