റിയാദ്: ലോക രാജ്യങ്ങളിൽ അന്താരാഷ്ട്ര കുടിയേറ്റക്കാരുടെ ഏറ്റവും മികച്ച മൂന്നാമത്തെ ലക്ഷ്യസ്ഥാനമാണ് സഊദി അറേബ്യയെന്ന് കണക്കുകൾ. യുണൈറ്റഡ് നേഷൻസ് ഇന്റർനാഷണൽ ഓർഗനൈസേഷൻ ഫോർ മൈഗ്രേഷൻ (ഐഒഎം) പുറത്തിറക്കിയ വേൾഡ് മൈഗ്രേഷൻ റിപ്പോർട്ട് 2022 പ്രകാരം 13.5 ദശലക്ഷം പ്രവാസികളെ രാജ്യത്തേക്ക് ആകർഷിക്കുന്നതിലൂടെ ബിസിനസ്സിനും നിക്ഷേപത്തിനുമുള്ള ആഗോള ലക്ഷ്യസ്ഥാനമായി സഊദി അറേബ്യ മാറിയിരിക്കുന്നു.

1970 മുതൽ അന്താരാഷ്‌ട്ര കുടിയേറ്റക്കാരുടെ പ്രധാന ലക്ഷ്യസ്ഥാനം യുണൈറ്റഡ് സ്റ്റേറ്റ്‌സ് ഓഫ് അമേരിക്കയാണെന്ന് റിപ്പോർട്ട് കാണിക്കുന്നു. അതിനുശേഷം, രാജ്യത്ത് താമസിക്കുന്ന വിദേശികളിൽ ജനിച്ചവരുടെ എണ്ണം 1970-ൽ 12 ദശലക്ഷത്തിൽ താഴെയായിരുന്നത് നാലിരട്ടിയിലധികം വർധിച്ചു 2019-ൽ 50.6 ദശലക്ഷമായി. കുടിയേറ്റക്കാരുടെ ഏറ്റവും വലിയ രണ്ടാമത്തെ ലക്ഷ്യസ്ഥാനമായ ജർമ്മനി 2000-ൽ 8.9 ദശലക്ഷത്തിൽ നിന്ന് 2020-ൽ ഏകദേശം 16 ദശലക്ഷമായി വർദ്ധിക്കുകയും ചെയ്‌തിട്ടുണ്ട്‌.

13.5 ദശലക്ഷം കുടിയേറ്റക്കാരുമായി സഊദി അറേബ്യ മൂന്നാം സ്ഥാനത്താണ്. റഷ്യ, യുണൈറ്റഡ് കിംഗ്ഡം, ഫ്രാൻസ്, യുണൈറ്റഡ് അറബ് എമിറേറ്റ്സ്, കാനഡ എന്നിവയാണ് തൊട്ടുപിന്നിൽ യഥാക്രമം. 2030 ആകുമ്പോഴേക്കും സഊദി അറേബ്യയിലെ ജനസംഖ്യ 50 ദശലക്ഷത്തിൽ എത്തണമെന്നും, 25 ദശലക്ഷം പൗരന്മാർക്ക് തുല്യമായ നിരക്കിൽ പ്രവാസികളും ഉണ്ടാകണമെന്നും കിരീടാവകാശി മുഹമ്മദ് ബിൻ സൽമാൻ നേരത്തെ പറഞ്ഞിരുന്നു എന്നത് ശ്രദ്ധേയമാണ്.