മുംബൈ: റിലയന്‍സ് ജിയോ 5ജി സേവനം ദീപാവലി മുതല്‍ ലഭ്യമായിത്തുടങ്ങുമെന്ന് റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനി. റിലയന്‍സ് വാര്‍ഷിക പൊതുയോഗത്തിലാണ് മുകേഷ് അംബാനി സുപ്രധാന പ്രഖ്യാപനം നടത്തിയത്.

ഇന്ന്, ഡിജിറ്റല്‍ കണക്റ്റിവിറ്റിയില്‍, പ്രത്യേകിച്ച് ഫിക്‌സഡ് ബ്രോഡ്ബാന്‍ഡില്‍ ജിയോ സൃഷ്ടിക്കുന്ന അടുത്ത കുതിപ്പ് പ്രഖ്യാപിക്കാന്‍ ഞാന്‍ ആഗ്രഹിക്കുന്നുവെന്ന് മുകേഷ് അംബാനി പറഞ്ഞു. 5 ജി ഉപയോഗിച്ച് ഞങ്ങള്‍ 100 ദശലക്ഷം വീടുകളെ സമാനതകളില്ലാത്ത ഡിജിറ്റല്‍ അനുഭവങ്ങളും സ്മാര്‍ട്ട് ഹോം സൊല്യൂഷനുകളും ഉപയോഗിച്ച് ബന്ധിപ്പിക്കുമെന്ന് അദ്ദേഹം വ്യക്തമാക്കി.

'ഞങ്ങള്‍ ദശലക്ഷക്കണക്കിന് ചെറുകിട വ്യാപാരികളെയും ചെറുകിട ബിസിനസുകളെയും വലിയ ഉയരങ്ങളിലെത്തിക്കും, ക്ലൗഡില്‍ നിന്ന് വിതരണം ചെയ്യുന്ന അത്യാധുനിക, പ്ലഗ് ആന്‍ഡ് പ്ലേ സൊല്യൂഷനുകള്‍ ഉപയോഗിച്ച് അവരെ ശാക്തീകരിക്കും.'മുകേഷ് അംബാനി പറഞ്ഞു.

ജിയോ 5ജി ഉപയോഗിച്ച്, റിലയന്‍സ് എല്ലാവരേയും എല്ലായിടത്തും ഉയര്‍ന്ന നിലവാരമുള്ളതും താങ്ങാനാവുന്നതുമായ ഡാറ്റയുമായി ബന്ധിപ്പിക്കുമെന്ന് അംബാനി പ്രഖ്യാപിച്ചു. ഇന്ത്യയുടെ ആവശ്യങ്ങള്‍ നിറവേറ്റുന്നതിനൊപ്പം, ആഗോള വിപണിയില്‍ ഡിജിറ്റല്‍ ആയിട്ടുള്ള എല്ലാ കാര്യങ്ങളിലും ഒരു പരിഹാരം ഇത് മുന്നോട്ടുവെക്കുമെന്ന് തങ്ങള്‍ക്ക് ആത്മവിശ്വാസമുണ്ടെന്നും മുകേഷ് അംബാനി പറഞ്ഞു.