കൊണ്ടോട്ടി: തെരുവ് നായ കുറകെ ചാടിയതിനെ തുടര്‍ന്ന് നിയന്ത്രണം വിട്ട ഗുഡ്‌സ് ഓട്ടോ മറിഞ്ഞ് യുവാവ് മരിച്ചു.ഐക്കരപ്പടി മൈലങ്ങോട്ട് ശ്രീനിലയത്തില്‍ തറമ്മല്‍തൊടി മുരളിയുടെ മകന്‍ സൗരവ് (21) ആണ് മരിച്ചത്. ഇന്ന് പുലര്‍ച്ചെ ഫാറൂഖ് കോളജ് വാഴക്കാട് റോഡിലെ കാരാട് സ്ഥാനാര്‍ഥി പടിയിലാണ് അപകടം.

കോഴിക്കോട് പാലായില്‍ നിന്ന് പന്തല്‍ ജോലി കഴിഞ്ഞ് സുഹൃത്ത് രാഹുല്‍ ശങ്കറിനോടൊപ്പം ഓട്ടോയില്‍ മടങ്ങി വരികയായിരുന്നു.ഇതിനിടയിലാണ് നായ കുറുകെ ചാടിയത്.ഇതോടെ നിയന്ത്രണം വിട്ട ഓട്ടോ സമീപത്തെ വീടിന്റെ മതില്‍ ഇടിച്ച് മറിയുകയായിരുന്നു.

ഉടന്‍ കോഴിക്കോട് മെഡിക്കല്‍ കോളജില്‍ എത്തിച്ചെങ്കിലും സൗരവ് മരിച്ചു.രാഹുല്‍ ശങ്കര്‍ മെഡിക്കല്‍ കോളജില്‍ ചികിത്സയിലാണ്. മാതാവ്: ഗീത(എസ്.ബി.ഐ കൊണ്ടോട്ടി ശാഖ).സഹോദരന്‍: മിഥുന്‍ ലാല്‍.