ന്യൂഡല്‍ഹി: വനിതാ ഹോസ്റ്റലില്‍നിന്നുള്ള സ്വകാര്യദൃശ്യങ്ങള്‍ സാമൂഹികമാധ്യമങ്ങളില്‍ പ്രചരിച്ചെന്ന പരാതിക്ക് പിന്നാലെ ചണ്ഡീഗഢ് സര്‍വകലാശാലയില്‍ വിദ്യാര്‍ഥികളുടെ പ്രതിഷേധം. . ശനിയാഴ്ച്ച രാത്രിയോടെ നൂറുകണക്കിന് വിദ്യാര്‍ഥികളാണ് ക്യാംപസിന് പുറത്ത് തടിച്ചുകൂടിയത്. സംഭവം മൂടിവെക്കാനാണ് സര്‍വകലാശാല അധികൃതര്‍ ശ്രമിക്കുന്നതെന്ന് വിദ്യാര്‍ഥികള്‍ ആരോപിച്ചു.

വനിതാ ഹോസ്റ്റലില്‍ താമസിക്കുന്ന പെണ്‍കുട്ടികളുടെ സ്വകാര്യദൃശ്യങ്ങള്‍ ഒരു പെണ്‍കുട്ടി രഹസ്യമായി പകര്‍ത്തുകയും ഇത് പിന്നീട് തന്റെ ആണ്‍സുഹൃത്തിന് അയച്ചുകൊടുക്കുകയുമായിരുന്നു. പിന്നാലെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചു. സംഭവത്തില്‍ ആരോപണവിധേയയായ പെണ്‍കുട്ടിയെ പൊലിസ് കസ്റ്റഡിയിലെടുത്തു. ഒന്നാം വര്‍ഷ എം.ബി.എ വിദ്യാര്‍ഥിനിയാണ് പിടിയിലായത്.

സര്‍വകലാശാലയിലെ പ്രതിഷേധങ്ങളുടെ വിവിധ ദൃശ്യങ്ങള്‍ സാമൂഹികമാധ്യമങ്ങളില്‍ പ്രചരിക്കുന്നുണ്ട്. രാത്രി വൈകിയും പെണ്‍കുട്ടികള്‍ കാമ്പസില്‍ പ്രതിഷേധിക്കുന്നതിന്റെ ദൃശ്യങ്ങളാണ് പുറത്തുവന്നത്.