ദോഹ; ലോകകപ്പ് കാണാന്‍ ജിദ്ദയില്‍നിന്ന് കാല്‍നടയായി സഊദി പൗരന്‍ ദോഹയിലേക്ക്. സഊദി സഞ്ചാരിയായ അബ്ദുല്ല അല്‍സലാമിയാണ് ഏകദേശം രണ്ട് മാസമെടുക്കുന്ന ഖത്തറിലേക്കുള്ള സാഹസിക യാത്രയ്ക്ക് തുടക്കം കുറിച്ചത്.
ഈ മാസം ഒമ്പതിന് ജിദ്ദയില്‍ നിന്ന് ആരംഭിച്ച യാത്രയിലാണ് നിലവില്‍ അബ്ദുല്ല അല്‍സലാമി. യാത്രയില്‍ 1,600 കിലോമീറ്റര്‍ കാല്‍നടയായി സഞ്ചരിക്കുമെന്ന് അല്‍ സലാമി തന്റെ ട്വിറ്റര്‍ അക്കൗണ്ടില്‍ പറഞ്ഞു. ദൈവത്തിന്റെ നാമത്തില്‍... സാഹസികത ആരംഭിക്കട്ടെ. ജിദ്ദ കടലില്‍നിന്ന് ദോഹ ഖത്തറിലേക്ക്'' എന്നിങ്ങനെയായിരുന്നു കുറിപ്പ്. തന്റെ യാത്രാനുഭവങ്ങള്‍ ദിവസേന രേഖപ്പെടുത്തും. ആസ്‌ത്രേലിയ, മെക്‌സിക്കോ തുടങ്ങിയ നിരവധി രാജ്യങ്ങളില്‍ നിന്നുണ്ടായ അനുഭവങ്ങളില്‍ നിന്ന് തികച്ചും വ്യത്യസ്തമാണീ യാത്രയെന്നും അദ്ദേഹം ട്വിറ്ററില്‍ കുറിച്ചു.
സഊദിയുടെയും ഖത്തറിന്റെയും ചെറിയ പതാകകള്‍ വഹിച്ചാണ് സലാമിയുടെ യാത്ര. രാത്രിയില്‍ ഉറങ്ങാന്‍ ചെറിയ ടെന്റും അല്‍ സലാമി തന്റെ ബാഗില്‍ കരുതിയിട്ടുണ്ട്. യാത്രയുടെ രംഗങ്ങള്‍ ദിവസവും സമൂഹ മാധ്യമങ്ങളില്‍ പോസ്റ്റ് ചെയ്യുന്നുണ്ട്. ഏകദേശം 60 ദിവസത്തിനുള്ളില്‍ ദോഹയിലെത്തുമെന്ന് പ്രതീക്ഷിക്കുന്നതായി അല്‍സലാമി പറഞ്ഞു.