ദുബൈ:പാകിസ്താനില്‍ നിന്നും ദൂബൈയിലേക്ക് പറന്ന വിമാനത്തില്‍ യാത്രക്കാരന്റെ വിളയാട്ടം. യുവാവിനെ ഒടുക്കം സീറ്റില്‍ കെട്ടിയിട്ടു. കഴിഞ്ഞ ദിവസമാണ് സംഭവം. പാകിസ്താനിലെ പെഷാവറില്‍ നിന്നും പാക് എയര്‍ലൈനിന്റെ വിമാനം പറന്നതുമുതല്‍ 21 കാരന്‍ അക്രമാസക്തനാവുകയായിരുന്നു. 160 ഓളം യാത്രക്കാരാണ് ഇതില്‍ ഉണ്ടായിരുന്നത്. എയര്‍ ബസ് എ 320 വിമാനത്തിന്റെ ഇടനാഴിയില്‍ മലര്‍ന്നു കിടന്ന് പ്രാര്‍ത്ഥന നടത്തിയ ഇയാള്‍ പിന്നീട് വിമാനത്തിന്റെ ജനാലകളില്‍ ചവിട്ടാനും മറ്റും തുടങ്ങി. ജീവനക്കാര്‍ സംസാരിക്കാന്‍ ശ്രമിച്ചപ്പോള്‍ ഇയാള്‍ കൂടുതല്‍ പ്രകോപിതനായി. പിന്നീട് ഇയാളെ സീറ്റില്‍ ബന്ധിക്കുകയായിരുന്നു. ദുബൈയില്‍ വിമാനം എത്തിയപ്പോഴെക്കും ഇയാള്‍ ശാന്തനായെന്ന് എയര്‍ലൈന്‍സ് വൃത്തങ്ങള്‍ അറിയിച്ചു.