റിയോ ഡി ജനീറോ: കോപ്പാ അമേരിക്കയുടെ സ്വപ്‌നഫൈനലില്‍ ബ്രസീലിന്റെ ചിറകരിഞ്ഞ് അര്‍ജന്റീന. എയ്ഞ്ചല്‍ ഡി മരിയയുടെ ഗോളില്‍ എതിരില്ലാത്ത ഒരു ഗോളിനാണ് നീലപ്പട വിജയഭേരി മുഴക്കിയത്. ജയത്തോടെ അര്‍ജന്റീനയുടെ 28 വര്‍ഷത്തെ കാത്തിരിപ്പിനാണ് വിരാമമാകുന്നത്. മുന്‍പ് 1993ലായിരുന്നു അര്‍ജന്റീനയുടെ അവസാന കിരീടധാരണം.
22ാം മിനിറ്റില്‍ ഏയ്ഞ്ചല്‍ ഡി മരിയ ഗോളിയെ ചിപ് ചെയ്ത് നേടിയ ഗോളിലാണ് അര്‍ജന്റീന ജയം സ്വന്തമാക്കിയത്. അര്‍ജന്റീന ജേഴ്‌സിയില്‍ കപ്പടിക്കാനുള്ള ലയണല്‍ മെസ്സി കാത്തിരിപ്പും ഇതോടെ അവസാനിച്ചു. ഇതോടെ കഴിഞ്ഞ തവണത്തെ കിരീടം നിലനിര്‍ത്താന്‍ ബ്രസീലിനായില്ല.