കോപ്പ അമേരിക്ക കിരീടം മെസിപ്പട സ്വന്തമാക്കിയതിന്റെ ആഹ്ലാദം ഉടുമ്പന്‍ചോലയിലെ വീട്ടിലിരുന്ന് ആഘോഷിക്കുകയാണ് മുന്‍മന്ത്രിയും എം.എല്‍.എയുമായ എം.എം മണി. ചിരിച്ചും ആവേശംകൊണ്ടും അര്‍ജന്റീനയുടെ വിജയഗോള്‍ മണിയാശാന്‍ ആഘോഷമാക്കി.

'ആശാനെ മെസി ചതിച്ചില്ല അണ്ണാ' എന്ന ഫേസ്ബുക്ക് പോസ്റ്റിന് താഴെ ഫുട്‌ബോള്‍ ആരാധകരുടെ ആവേശവും തോല്‍വിയുടെ മറുപടികളും നിറയുകയാണ്. ബ്രസീല്‍ അര്‍ജന്റീന ആരാധകര്‍ ഒപ്പത്തിനൊപ്പമുണ്ട്.

അതേസമയം ബ്രസീലിനോട് മറുപടി പറയാനും ആശാന്‍ മറന്നില്ല.'നമ്മളെ അനാവശ്യമായി ചൊറിയാന്‍ വന്നാ നമ്മളങ്ങ് കേറി മാന്തും, അല്ല പിന്നെ', എം. എം മണി ഫേസ്ബുക്കില്‍ കുറിച്ചു.

അര്‍ജന്റീന ജയിക്കുമെന്ന് ഉറച്ച് പറഞ്ഞ അദ്ദേഹം സാമൂഹ്യമാധ്യമങ്ങളിലടക്കം ഫുട്‌ബോള്‍ പ്രേമികള്‍ക്ക് ആവേശമായിരുന്നു. ബ്രസീല്‍ നന്നായി കളിച്ചു. അവര്‍ ഒരു ഗോളിനല്ലേ തോറ്റത്. അവര്‍ കൂടുതല്‍ കരുത്തോടെ തിരിച്ചുവരാന്‍ നോക്കുക. അങ്ങനല്ലേ? ഇതൊരു മത്സരവാ. ഇതിനകത്ത് വിദ്വേഷത്തിന്റെ ഒന്നും പ്രശ്‌നമില്ലല്ലോ', ആശാന്‍ പറഞ്ഞു.