ശ്രീനഗര്‍: സൗത്ത് കശ്മിരിലെ പുല്‍വാമയില്‍ ഭീകവാദികളും സുരക്ഷാസേനയുമായുണ്ടായ ഏറ്റുമുട്ടലില്‍ പാകിസ്താന്‍ സ്വദേശിയായ ലഷ്‌ക്കറെ ത്വയ്യിബ കമാന്‍ഡറടക്കം മൂന്ന് ഭീകരര്‍ കൊല്ലപ്പെട്ടുു. അലിജാസ് എന്ന അബു ഹുറൈറയാണ് കൊല്ലപ്പെട്ട ലഷ്‌ക്കര്‍ കമാന്‍ഡര്‍.

മറ്റു രണ്ടു ഭീകരര്‍ പുല്‍വാമ സ്വദേശികളാണ്. ഇവര്‍ ഒളിച്ചിരുന്ന വീട് സൈന്യം തകര്‍ത്തു. അതോടൊപ്പം സമീപത്തെ ചില വീടുകള്‍ക്കും കേടുപാടുകള്‍ പറ്റി. പുല്‍വാമ നഗരത്തില്‍ ചൊവ്വാഴ്ച രാത്രി സുരക്ഷാ സൈന്യവും പൊലിസിനും നടത്തിയ തിരച്ചിലിനു പിന്നാലെയായിരുന്നു ഏറ്റുമുട്ടല്‍. ഭീകരര്‍ പുല്‍വാമയിലെത്തിയെന്ന വിവരം ലഭിച്ചതിന്റെ അടിസ്ഥാനത്തിലായിരുന്നു തിരച്ചില്‍. ഏറ്റുമുട്ടലിനു പിന്നാലെ പ്രദേശത്ത് പ്രശ്‌നങ്ങളുണ്ടാകാനുള്ള സാധ്യത കണക്കിലെടുത്ത് കര്‍ഫ്യൂ പ്രഖ്യാപിക്കുകയും ഇന്റര്‍നെറ്റ് റദ്ദാക്കുകയും ചെയ്തു. അതിനിടെ ജമ്മുവിലെ അന്താരാഷ്ട്ര അതിര്‍ത്തിയില്‍ കഴിഞ്ഞ ദിവസം പ്രത്യക്ഷപ്പെട്ട പാക് ഡ്രോണിനെ വെടിവച്ചു തുരത്തിയതായി ബി.എസ്.എഫ്. ചൊവ്വാഴ്ച രാത്രിയാണ് അറിന മേഖലയില്‍ ഡ്രോണ്‍ പ്രത്യക്ഷപ്പെട്ടത്. ഡ്രോണിന്റെ ചുവന്ന ലൈറ്റ് ശ്രദ്ധയില്‍പ്പെട്ട ബി.എസ്.എഫ് അതിനുനേരെ നിറയൊഴിച്ചു. പിന്നാലെ ഡ്രോണ്‍ പാകിസ്താന്‍ ഭാഗത്തേക്ക് തിരിച്ചു പറന്നു.