ഡല്‍ഹി: നിയമസഭയില്‍ പാസാക്കിയ ബില്ലുകളില്‍ തീരുമാനമെടുക്കാത്തതിനെതിരെ സുപ്രിംകോടതിയില്‍ അസാധാരണ നീക്കം നടത്തി കേരളം. രാഷ്ട്രപതിയുടെ ഓഫീസിനെതിരെ കേരളം ഹരജി നല്‍കുകയായിരുന്നു. തീരുമാനമെടുക്കാന്‍ രാഷ്ട്രപതിയുടെ സെക്രട്ടറിക്ക് നിര്‍ദ്ദേശം നല്‍കണമെന്നും ആവശ്യപ്പെട്ടിട്ടുണ്ട്. രാഷ്ട്രപതിയുടെ സെക്രട്ടറിയെ കക്ഷി ചേര്‍ക്കണമെന്നാണ് കേരളത്തിന്റെ അപേക്ഷ.

നിയമസഭ പാസാക്കിയ നാലു ബില്ലുകളാണ് നിലവില്‍ രാഷ്ട്രപതിയുടെ പരിഗണനയില്‍ ഉള്ളത്. സംസ്ഥാന നിയമസഭ പാസാക്കിയ ബില്ലുകളൊന്നും കേന്ദ്ര സംസ്ഥാന ബന്ധങ്ങളെ ബാധിക്കുന്നവയല്ല. ഗവര്‍ണ്ണര്‍ അയച്ച ബില്ലുകള്‍ക്ക് രാഷ്ട്രപതിയുടെ അംഗീകാരം ആവശ്യമില്ല. സംസ്ഥാനത്തിന്റെ അധികാര പരിധിയില്‍ വരുന്ന ബില്ലുകള്‍ തടഞ്ഞുവയ്ക്കണമെന്ന കേന്ദ്ര സര്‍ക്കാരിന്റെ ഉപദേശം ഭരണഘടനാ വിരുദ്ധമാണ്. ഇത് ഫെഡറല്‍ ഘടനയെ ദോഷകരമായി ബാധിക്കുന്നതാണെന്നും ആണ് കേരളത്തിന്റെ ഹരജിയിലെ വാദം. 

ഈ സാഹചര്യത്തില്‍ നാല് ബില്ലുകള്‍ തടഞ്ഞുവെച്ച രാഷ്ട്രപതിയുടെ നടപടി ഭരണഘനാ വിരുദ്ധമാണെന്ന് പ്രഖ്യാപിക്കണം. ബില്ലുകള്‍ തടഞ്ഞ തീരുമാനം റദ്ദാക്കണം. ഇതിനായി സുപ്രിംകോടതി അതിന്റെ അസാധാരണ അധികാരം ഉപയോഗിക്കണമെന്നുമാണ് കേരളത്തിന്റെ ഹരജിയിലെ ആവശ്യം.

ലോകായുക്തയുടെ അധികാരം വെട്ടിക്കുറയ്ക്കുന്ന ബില്ലിനു രാഷ്ട്രപതി അനുമതി നല്‍കിയിരുന്നു. എന്നാല്‍, ചാന്‍സലര്‍ സ്ഥാനത്തുനിന്നു ഗവര്‍ണറെ പുറത്താക്കുന്നത് ഉള്‍പ്പെടെ സര്‍വകലാശാലാ നിയമഭേദഗതി ബില്ലുകളും മില്‍മയുടെ ഭരണം സര്‍ക്കാര്‍ നിയന്ത്രണത്തില്‍ ആക്കുന്നതിനുള്ള ബില്ലും രാഷ്ട്രപതി തടഞ്ഞുവച്ചിരിക്കുകയാണ്.