ദുബയ്: യു.എ.ഇയില്‍ ഏതെങ്കിലും മതങ്ങളെ അവഹേളിക്കുന്നതോ നിന്ദിക്കുന്നതോ അപകീര്‍ത്തിപ്പെടുത്തുന്നതോ ആയ ഉള്ളടക്കം സമൂഹ മാധ്യമങ്ങളില്‍ പോസ്റ്റുചെയ്താല്‍ ഏഴ് വര്‍ഷം വരെ തടവും 250,000 ദിര്‍ഹം മുതല്‍ 10 ലക്ഷം ദിര്‍ഹം വരെ പിഴയും ലഭിക്കും. മനുഷ്യക്കടത്ത്, അശ്ലീലം, വേശ്യാവൃത്തി, ധാര്‍മികതയക്ക് നിരക്കാത്ത പ്രവര്‍ത്തനങ്ങള്‍, സ്ത്രീകള്‍ക്കും കുട്ടികള്‍ക്കും ഹാനികരമായ ഉള്ളടക്കം തുടങ്ങിയ കുറ്റകൃത്യങ്ങള്‍ക്ക് ഒന്നു മുതല്‍ അഞ്ച് വര്‍ഷം വരെ തടവും 250,000 ദിര്‍ഹം മുതല്‍ 10 ലക്ഷം ദിര്‍ഹം വരെ പിഴയുമാണ് ശിക്ഷ.

ഒരാളുടെ സ്വകാര്യതയിലേക്കും വ്യക്തിജീവിതത്തിലേക്കും കടന്നുകയറുന്ന ഫോട്ടോകളോ വിഡിയോകളോ കമന്റുകളോ പോസ്റ്റ് ചെയ്യുന്നത് ചുരുങ്ങിയത് ആറ് മാസം തടവും 150,000 ദിര്‍ഹം മുതല്‍ 500,000 ദിര്‍ഹം വരെ പിഴയും ലഭിക്കാവുന്ന കുറ്റകൃത്യമാണ്. സര്‍ക്കാര്‍ വകുപ്പുകള്‍, ഭരണകൂടം, ചിഹ്നങ്ങള്‍ എന്നിവയെ അവമതിക്കുന്നതും യു.എ.ഇയുടെയോ മറ്റേതെങ്കിലും രാജ്യങ്ങളുടെയോ രാഷ്ട്രീയ വ്യവസ്ഥകളെ അപകീര്‍ത്തിപ്പെടുത്തുന്നതും ഗൗരവമുള്ള സൈബര്‍ കുറ്റകൃത്യമാണ്.

യു.എ.ഇയുടെ സംസ്‌കാരത്തിനും പൈതൃകത്തിനുമെതിരായ പോസ്റ്റുകള്‍, കിംവദന്തികള്‍, തെറ്റായ വാര്‍ത്തകള്‍, ക്രിമിനല്‍ അന്വേഷണങ്ങളുമായി ബന്ധപ്പെട്ട രഹസ്യസ്വഭാവമുള്ള കാര്യങ്ങള്‍ വെളിപ്പെടുത്തല്‍ എന്നിവ പാടില്ല. നിയമങ്ങളും പൊതുധാര്‍മികതയും ലംഘിക്കാത്ത പരസ്യങ്ങള്‍ മാത്രമേ പാടുള്ളൂ. സോഷ്യല്‍ മീഡിയ പ്ലാറ്റ്‌ഫോമുകള്‍ ഉപയോഗിക്കുന്നതിന് യു.എ.ഇ മികച്ച സേവനങ്ങള്‍ നല്‍കിവരുന്നുണ്ടെങ്കിലും ഉപയോക്താക്കള്‍ രാജ്യത്തെ സൈബര്‍ നിയമങ്ങളും പൊതുമര്യാദകളും പാലിക്കേണ്ടതുണ്ട്.