ന്യൂഡല്‍ഹി: 33 ശതമാനം സീറ്റുകള്‍ ലോക്‌സഭയിലും, നിയമസഭയിലും വനിതകള്‍ക്കായി സംവരണം ചെയ്യുന്ന ഭരണഘടനാ ഭേദഗതിബില്‍ ലോക്‌സഭ പാസാക്കി. ബില്ലിനെ അനുകൂലിച്ച് 454പേര്‍ വോട്ട് ചെയ്തപ്പോള്‍, 2 എംപിമാരാണ് എതിര്‍ത്ത് വോട്ട് ചെയ്തത്. ബില്‍ നാളെ രാജ്യസഭയുടെ പരിഗണനയിലേക്കെത്തും.ന്യൂനപക്ഷങ്ങള്‍ക്കും പിന്നാക്ക സമുദായക്കാര്‍ക്കും ഉപസംവരണം വേണമെന്ന അസദുദ്ദീന്‍ ഉവൈസിയുടെ ഭേദഗതി ലോക്‌സഭ ശബ്ദ വോട്ടോടെ തള്ളുകയായിരുന്നു.

'നാരി ശക്തി വന്ദന്‍ അധിനിയം' എന്നാണ് ബില്ലിന് പേരിട്ടിരിക്കുന്നത്. വനിതാ സംവരണം നടപ്പാക്കാന്‍ മണ്ഡലപുനര്‍നിര്‍ണയം അനിവാര്യമെന്ന് നിയമമന്ത്രി പറഞ്ഞു.നിലവില്‍ പട്ടികവിഭാഗത്തിനായി സംവരണം ചെയ്തിട്ടുള്ളതില്‍ മൂന്നിലൊന്നു സീറ്റ് ആ വിഭാഗത്തിലെ വനിതകള്‍ക്കായി നീക്കിവയ്ക്കാനും വ്യവസ്ഥയുള്ളതാണു നിയമമന്ത്രി അര്‍ജുന്‍ റാം മേഘ്‌വാള്‍ അവതരിപ്പിച്ച ബില്‍. ഭേദഗതി നടപ്പിലായി 15 വര്‍ഷത്തേക്കാണ് സംവരണം. എന്നാല്‍, ഈ കാലാവധി നീട്ടാനും ബില്ലില്‍ വ്യവസ്ഥയുണ്ട്.

Content Highlights:Lok Sabha passes Women's Reservation Bill