തിരുവനന്തപുരം: ഭരണഘടന ഗവര്‍ണര്‍ക്കും ബാധകമാണെന്നും ഗവര്‍ണറെ പേടിക്കേണ്ടതില്ലെന്നും വിദ്യാഭ്യാസ മന്ത്രി വി. ശിവന്‍ കുട്ടി. ഗവര്‍ണര്‍ വിമര്‍ശനത്തിന് അതീതനല്ല. ജനങ്ങള്‍ വോട്ട് ചെയ്ത് വിജയിപ്പിച്ചവരാണ് മന്ത്രിമാരെന്നും അദ്ദേഹം കൂട്ടിച്ചേര്‍ത്തു.

മന്ത്രിമാര്‍ ഗവര്‍ണര്‍ പദവിയുടെ അന്തസ്സ് കെടുത്തിയാല്‍ മന്ത്രിസ്ഥാനം റദ്ദാക്കുമെന്ന് ഇന്നലെ ആരിഫ് മുഹമ്മദ് ഖാന്‍ മുന്നറിയിപ്പ് നല്‍കിയിരുന്നു. മുഖ്യമന്ത്രിക്കും മന്ത്രിസഭക്കും ഗവര്‍ണറെ ഉപദേശിക്കാന്‍ എല്ലാ അവകാശവുമുണ്ടെന്നും എന്നാല്‍ ഗവര്‍ണര്‍ പദവിയുടെ അന്തസ്സ് കെടുത്തുന്ന പ്രസ്താവനകള്‍ വ്യക്തിപരമായി മന്ത്രിമാര്‍ നടത്തിയാല്‍ 'പ്ലഷര്‍' (പ്രീതി) പിന്‍വലിക്കുന്നതടക്കം നടപടികള്‍ സ്വീകരിക്കുമെന്നുമാണ് ഗവര്‍ണര്‍ ട്വീറ്റിലൂടെ വ്യക്തമാക്കിയത്.

'പ്രീതി തത്വം' അഥവാ ഡൊക്ട്രിന്‍ ഓഫ് പ്ലഷര്‍ എന്നത് ഇംഗ്ലിഷ് നിയമത്തില്‍ ഉടലെടുത്ത പ്രമാണമാണ്. രാജാവിന്റെ പ്രീതിയുള്ളിടത്തോളമാണ് പൊതുസേവകരുടെ തൊഴില്‍ നിലനില്‍ക്കുന്നതെന്നതാണ് ഇതിലെ ധാര്‍മികതത്വം. ആയതിനാല്‍, രാജാവിന് പ്രത്യേകിച്ച് കാരണമൊന്നും പറയാതെ, അപ്രീതിക്ക് കാരണമായാല്‍ ജീവനക്കാരുടെ സേവനം അവസാനിപ്പിക്കാം. ഈ രീതി അനുവര്‍ത്തിക്കുമെന്നാണ് ഗവര്‍ണര്‍ സൂചന നല്‍കിയത്.

ഗവര്‍ണറുടെ ട്വീറ്റ് ഇന്നലെ തന്നെ വന്‍ വിവാദമായിരുന്നു. സര്‍ക്കാറും ഗവര്‍ണറും തമ്മില്‍ ഏറെ നാളായി നിലനില്‍ക്കുന്ന ഭിന്നതക്ക് ആക്കം കൂട്ടുംവിധമാണ് മന്ത്രിമാരെ പുറത്താക്കുമെന്ന ഭീഷണിയുമായി ഗവര്‍ണര്‍ പരസ്യമായി രംഗത്തുവന്നത്. സര്‍വകലാശാല വിഷയത്തില്‍ ഗവര്‍ണര്‍ക്കെതിരെ മന്ത്രി ആര്‍. ബിന്ദു അടക്കം നടത്തിയ പരാമര്‍ശമാണ് ഗവര്‍ണറെ ചൊടിപ്പിച്ചതെന്നാണ് സൂചനകള്‍.

മന്ത്രിമാരെ പുറത്താക്കാന്‍ ഗവര്‍ണര്‍ക്ക് അവകാശമില്ലെന്ന് ലോക്‌സഭ മുന്‍ സെക്രട്ടറി ജനറല്‍ പി.ഡി.ടി. ആചാരി അടക്കമുള്ള ഭരണഘടന വിദഗ്ധര്‍ അഭിപ്രായപ്പെട്ടു. ഗവര്‍ണര്‍ക്ക് ഇതിന് അധികാരമില്ലെന്ന നിലപാടിലാണ് പ്രതിപക്ഷവും. ഗവര്‍ണര്‍ക്കെതിരെ രൂക്ഷ വിമര്‍ശനവുമായി രംഗത്തുവന്ന സി.പി.എം സംസ്ഥാന സെക്രട്ടറി എം.വി. ഗോവിന്ദന്‍ ഭരണഘടനാപരമായി ചെറുക്കുമെന്ന് വ്യക്തമാക്കി.