നെടുമ്പാശ്ശേരി :സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ ഹജ്ജ് കര്‍മ്മം നിര്‍വ്വഹിച്ച് മടങ്ങിവരുന്ന തീര്‍ഥാടകര്‍ക്ക് വിതരണം ചെയ്യാനുള്ള സംസം വെള്ളം പൂര്‍ണ്ണമായും നെടുമ്പാശ്ശേരിയില്‍ താല്‍ക്കാലികമായി ഒരുക്കിയിട്ടുള്ള ഹജ്ജ് ക്യാംപില്‍ എത്തിച്ചു.
തീര്‍ഥാടകരെ കൊണ്ടുപോകുന്നതിന് ജിദ്ദയില്‍ നിന്നും നെടുമ്പാശ്ശേരിയിലെത്തിയ മൂന്ന് സഊദി എയര്‍ലൈന്‍സ് വിമാനങ്ങളിലായാണ് സംസം വെള്ളം കൊണ്ടുവന്നത്.
11000 ത്തോളം തീര്‍ഥാടകര്‍ക്ക് വിതരണം ചെയ്യാനുള്ള സംസം വെള്ളമാണ് എത്തിച്ചിരിക്കുന്നത്.ചൊവ്വാഴ്ച്ച രണ്ട് വിമാനങ്ങളിലായി 42500 ലിറ്ററും,ഇന്നലെ രാവിലെ വന്ന വിമാനത്തില്‍ 12500 ലിറ്റര്‍ സംസം വെള്ളവുമാണ് കൊണ്ടുവന്നത്.
ഹജ്ജ് കര്‍മ്മം പൂര്‍ത്തിയാക്കി തീര്‍ഥാടകര്‍ നെടുമ്പാശ്ശേരിയില്‍ മടങ്ങിയെത്തുമ്പോള്‍ സംസം വിതരണം ചെയ്യും.ഓരോ തീര്‍ഥാടകനും 5 ലിറ്റര്‍ സംസം വെള്ളം വീതമാണ് നല്‍കുക.തീര്‍ഥാടകര്‍ക്ക് സ്വന്തം നിലയില്‍ സംസം കൊണ്ടുവരാന്‍ അനുമതിയില്ല.
നെടുമ്പാശ്ശേരിയിലെ എയര്‍ക്രാഫ്റ്റ് മെയിന്റനന്‍സ് ഹാങ്കറില്‍ എത്തിച്ച സംസം വെള്ളം പ്രത്യേകം സൂക്ഷിച്ചിരിക്കുകയാണ്.