ചരിത്രത്തിലേക്ക് ഒരു സ്മാഷ്; ബാഡ്മിന്റണില്‍ ഇന്ത്യക്ക് ആദ്യ സ്വര്‍ണം

ഹാങ്‌ചോ: ഏഷ്യന്‍ ഗെയിംസ് ചരിത്രത്തിലാദ്യമായി ബാഡ്മിന്റണില്‍ സ്വര്‍ണം നേടി ഇന്ത്യ. സാത്വിക് സായ് രാജ് രങ്കിറെഡ്ഡിചിരാഗ് ഷെട്ടി സഖ്യമാണ് ബാഡ്മിന്റണ്‍ ഡബ്ള്‍സില്‍ ഇന്ത്യക്ക് ചരിത്ര വിജയം സമ്മാനിച്ചത്. ഫൈനലില്‍ കൊറിയയുടെ ചോയ് സോല്‍ ഗയ്കിം വോന്‍ ഹോ സഖ്യത്തെയാണ് ഇന്ത്യന്‍ താരങ്ങള്‍ തോല്‍പിച്ചത്. സ്‌കോര്‍ 21-18, 21-16.

ഏഷ്യന്‍ ഗെയിംസ് ചരിത്രത്തില്‍ ബാഡ്മിന്റണില്‍ ഇന്ത്യ ആദ്യമായാണ് സ്വര്‍ണം നേടുന്നത്. നേരത്തെ, സിംഗ്ള്‍സില്‍ പ്രണോയ് വെങ്കലം നേടിയിരുന്നു. സെമിയില്‍ മലേഷ്യയുടെ ആരോണ്‍ ചിയസോഹ് വൂയി യിക് സഖ്യത്തെ മുക്കാല്‍ മണിക്കൂര്‍ മാത്രമെടുത്ത മാസ്റ്റര്‍ ക്ലാസ് പ്രകടനവുമായി നിശ്ശൂന്യരാക്കിയാണ് ലോക മൂന്നാം നമ്പര്‍ ജോടി കലാശപ്പോരിലേക്ക് യോഗ്യത നേടിയത്.

പേരുകേട്ട താരനിര ഏറെ പിറന്ന മണ്ണായിട്ടും ഏഷ്യന്‍ ഗെയിംസ് ബാഡ്മിന്റണില്‍ ഇതുവരെയും സ്വര്‍ണം ചൂടിയില്ലെന്ന നാണക്കേടാണ് സാത്വിക് ചിരാഗ് സഖ്യം തിരുത്തിയത്. ഇതോടെ ഗെയിംസില്‍ ഇന്ത്യയുടെ മെഡല്‍ നേട്ടം 101 ആയി.