കാബൂള്‍: അഫ്ഗാനിസ്താനിലെ 34 പ്രവിശ്യകളും നിയന്ത്രണത്തിലാക്കിയ താലിബാന്‍ സായുധസേന തലസ്ഥാനമായ കാബൂളിലും പ്രവേശിച്ചു. കാബൂളിന്റെ എല്ലാ അതിര്‍ത്തികളിലും നേരത്തെ നിലയുറപ്പിച്ച താലിബാര്‍ സമാധാനപരമായ അധികാര കൈമാറ്റത്തിനു വേണ്ടി അഫ്ഗാന്‍ സര്‍ക്കാരുമായി ചര്‍ച്ചയാരംഭിച്ചതിനിടെയാണ് നഗരത്തില്‍ കടന്നത്. പൊലിസുകാര്‍ പിന്മാറിയതിനാല്‍ കവര്‍ച്ച തടയുന്നതിനായിട്ടാണ് സേന കാബൂളില്‍ കടന്നതെന്ന് പാര്‍ട്ടി വക്താവ് സബീഹുല്ല മുജാഹിദ് അറിയിച്ചു.

ചര്‍ച്ച നടക്കുന്ന സാഹചര്യത്തില്‍ സൈനികശക്തിയുപയോഗിച്ച് അധികാരം പിടിച്ചെടുക്കുകയില്ലെന്ന് താലിബാന്‍ സര്‍ക്കാരിന് ഉറപ്പുനല്‍കിയതായി അല്‍ജസീറ റിപ്പോര്‍ട്ട് ചെയ്തിരുന്നു. സമാധാനപരമായ അധികാര കൈമാറ്റത്തിന് സര്‍ക്കാരിന്റെ സഹകരണം പ്രതീക്ഷിക്കുന്നതായും സേന കാബൂളില്‍ നിന്ന് ഏതാനും കിലോമീറ്ററുകള്‍ അകലെയാണെന്നും താലിബാന്റെ അന്താരാഷ്ട്ര മാധ്യമ വക്താവ് സുഹൈല്‍ ഷഹീന്‍ അല്‍ജസീറയോടു വ്യക്തമാക്കിയിരുന്നു. എന്നാല്‍ അഫ്ഗാന്‍ സുരക്ഷാ ഉദ്യോഗസ്ഥര്‍ പിന്‍വാങ്ങിയതോടെ നഗരസുരക്ഷയുടെ പേരിലാണ് താലിബാന്‍ കാബൂളില്‍ പ്രവേശിച്ചതെന്നാണ് റിപ്പോര്‍ട്ട്.

അക്രമപ്രവര്‍ത്തനങ്ങളില്‍ നിന്ന് വിട്ടുനില്‍ക്കാനും കാബൂള്‍ വിട്ടുപോകുന്നവര്‍ക്ക് സുഗമമായ യാത്രാ സൗകര്യമൊരുക്കാനും പോരാളികള്‍ക്ക് നിര്‍ദേശം നല്‍കിയതായി താലിബാന്‍ വക്താവ് അറിയിച്ചു. അതേസമയം അധികാരകൈമാറ്റം പൂര്‍ത്തിയാകുന്നതുവരെ തലസ്ഥാനത്തിന്റെ സുരക്ഷ ഉറപ്പാക്കേണ്ട ഉത്തരവാദിത്വം സര്‍ക്കാരിനാണെന്നും അദ്ദേഹം ട്വീറ്റ് ചെയ്തു. തലസ്ഥാനത്തെ ബാങ്കുകള്‍, വ്യാപാരസ്ഥാപനങ്ങള്‍, സ്വകാര്യ സംരംഭകരുടെ സ്വത്തുക്കള്‍, പണം, സ്ഥാപനങ്ങള്‍ എന്നിവയെല്ലാം സുരക്ഷിതമായിരിക്കുമെന്ന് താലിബാന്‍ പ്രസ്താവനയില്‍ വ്യക്തമാക്കി.