കോഴിക്കോട്: കൊവിഡിന്റെ മറവില്‍ വിദൂര വിദ്യാഭ്യാസം വിദ്യാര്‍ഥികളെ വട്ടംകറക്കി സര്‍വകലാശാലകളും പഠനകേന്ദ്രങ്ങളും.
കൊവിഡ് നിയന്ത്രണത്തില്‍ സാധാരണ ക്ലാസുകള്‍ നടത്താന്‍ കഴിയില്ലെന്നതിനാല്‍ ഓണ്‍ലൈന്‍ ക്ലാസുകള്‍ നടക്കുമെന്നും സ്റ്റഡി മെറ്റീയരുകള്‍ അയച്ചു കൊടുക്കുമെന്നുമാണ് അധികൃതര്‍ വിദ്യാര്‍ഥികളെ അറിയിച്ചത്. എന്നാല്‍ ഓണ്‍ലൈന്‍ ക്ലാസുകള്‍ കൃത്യമായി ലഭിക്കുന്നില്ലെന്നു മാത്രമല്ല ഭൂരിഭാഗം പഠന കേന്ദ്രങ്ങളും ഫീസിനത്തില്‍ യാതൊരു തരത്തിലുള്ള ഇളവുകളും കുട്ടികള്‍ക്കു നല്‍കുന്നുമില്ല.കാലിക്കറ്റ് സര്‍വകലാശാലയ്ക്കും ഇതര സംസ്ഥാനങ്ങളില്‍നിന്നുള്ള സര്‍വകലാശാലകളുടെ പഠനകേന്ദ്രങ്ങള്‍ക്കുമെതിരേ ഇത്തരത്തിലുള്ള ആരോപണം ശക്തമാണ്.
കൊവിഡ് വ്യാപനം തുടങ്ങിയതിനുശേഷം സര്‍വകലാശാലകള്‍ വിദൂരവിദ്യാഭ്യാസം വിദ്യാര്‍ഥികള്‍ക്ക് കോണ്‍ടാക്റ്റ് ക്ലാസുകള്‍ നല്‍കുന്നില്ല. പകരം വിഡിയോ ക്ലാസുകള്‍ നല്‍കുകയാണ് ചെയ്യുന്നത്. കാലിക്കറ്റ് സര്‍വകലാശാലയുടെ ഇത്തരംക്ലാസുകളെല്ലാം അപൂര്‍ണമാണെന്നു വിദ്യാര്‍ഥികള്‍ പറയുന്നു. പി.ജി പരീക്ഷകള്‍ക്കടക്കം ഹാള്‍ടിക്കറ്റ് ലഭിക്കുന്നത് തലേദിവസമായിരുന്നു. ചില വിഷയങ്ങളില്‍ സിലബസ് പുതുക്കിയിട്ടും പഴയ സിലബസ് പ്രകാരമുള്ള ചോദ്യപേപ്പറാണ് പരീക്ഷാര്‍ഥികള്‍ക്ക് ലഭിച്ചതെന്നും പരാതിയുണ്ട്. സ്റ്റഡി മെറ്റീരിയല്‍ വളരെ വൈകി മാത്രമാണ് വിതരണം ചെയ്യുന്നത്. അതിനാല്‍ പഠിക്കാന്‍ അവസരം ലഭിക്കുന്നുമില്ല.

കൊവിഡില്‍ മുടങ്ങിയ സെമസ്റ്റര്‍ പരീക്ഷകള്‍ ചുരുങ്ങിയ ദിവസങ്ങളുടെ ഇടവേളകളിലാണ് നടത്തുന്നത്. മറ്റുസംസ്ഥാനങ്ങളിലെ യൂനിവേഴ്‌സിറ്റികളുടെ പഠന കേന്ദ്രങ്ങളിലും സ്ഥിതി വ്യത്യസ്തമല്ല. എന്‍ജിനീയറിങ് ഡിപ്ലോമ പോലുള്ള പ്രഫഷനല്‍ കോഴ്‌സുകള്‍ നടത്തുന്ന സ്ഥാപനങ്ങള്‍ ട്രെയിനിങ്, ലാബ് സൗകര്യങ്ങളൊന്നും വിദ്യാര്‍ഥികള്‍ക്ക് നല്‍കുന്നില്ല. പേരിനു മാത്രം നടക്കുന്ന ഓണ്‍ലൈന്‍ ക്ലാസിനാവട്ടെ മുഴുവന്‍ഫീസും നല്‍കണം. അരുണാചല്‍ യുനിവേഴ്‌സിറ്റി എന്‍ജിനീയറിങ് ട്രെയിനിങ് സെന്ററുകള്‍ അടക്കമുള്ള പല കേന്ദ്രങ്ങളും ഫൈനല്‍ പരീക്ഷ എഴുതണമെങ്കില്‍ ഫീസ് മുഴുവന്‍ അടയ്ക്കണമെന്ന നിബന്ധനയാണ് വിദ്യാര്‍ഥികള്‍ക്കു മുന്നില്‍ വയ്ക്കുന്നത്.
ഓണ്‍ലൈന്‍ ക്ലാസുപോലും നല്‍കാതെയാണ് ഇവര്‍ ഫീസ് ഈടാക്കുന്നത്. ആറുമാസംകൊണ്ട് തീര്‍ക്കേണ്ട പാഠഭാഗങ്ങള്‍ ഒന്നോ രണ്ടോ മാസം കൊണ്ട് തീര്‍ക്കുകയും ചെയ്യുന്നു.