100 രൂപ ലാഭം കിട്ടിയാല്‍ 35 രൂപയും സര്‍ക്കാര്‍ കൊണ്ടുപോകുന്നുവെന്ന് വിമര്‍ശനം
ന്യൂഡല്‍ഹി: ടെലികോം മേഖലയില്‍നിന്നു സര്‍ക്കാര്‍ കൂടുതല്‍ നികുതി ഈടാക്കുന്നുവെന്ന വിമര്‍ശനവുമായി ഭാരതി എയര്‍ടെല്‍ മേധാവി സുനില്‍ മിത്തല്‍. നൂറു രൂപ ലാഭം ലഭിക്കുകയാണെങ്കില്‍ അതില്‍ 35 രൂപയും പലവിധേന സര്‍ക്കാര്‍ കൊണ്ടുപോകുന്നുവെന്നായിരുന്നു ഡല്‍ഹിയില്‍ നിക്ഷേപക സംഗമത്തില്‍ സംസാരിക്കവേ അദ്ദേഹം കുറ്റപ്പെടുത്തിയത്.
എ.ജി.ആര്‍ കുടിശ്ശിക ടെലികോം കമ്പനികള്‍ക്കു വലിയ ബാധ്യത സൃഷ്ടിച്ചിരിക്കുകയാണെന്നും അദ്ദേഹം കുറ്റപ്പെടുത്തി. അടുത്ത വര്‍ഷത്തോടെ 5 ജിയുടെ പ്രവര്‍ത്തനങ്ങള്‍ തുടങ്ങും. 2023 പകുതിയോടെ രാജ്യത്ത് 5 ജി അവതരിപ്പിക്കാനാകുമെന്നാണ് പ്രതീക്ഷ. എന്നാല്‍, താരിഫുകളില്‍ വര്‍ധനവുണ്ടാകുമെന്നും അദ്ദേഹം വ്യക്തമാക്കി.
ടെലികോം രംഗത്ത് 21,000 കോടി രൂപയുടെ നിക്ഷേപം ലക്ഷ്യമിട്ടാണ് എയര്‍ടെല്‍ മുന്നോട്ടുപോകുന്നത്. 5 ജി കൊണ്ടുവരാന്‍ കൂടുതല്‍ നിക്ഷേപം നടത്തേണ്ടതുണ്ട്. ടെലികോം രംഗത്തേക്കു കൂടുതല്‍ നിക്ഷേപം വരണമെങ്കില്‍ സര്‍ക്കാര്‍ നിലപാട് മയപ്പെടുത്തണമെന്നും അദ്ദേഹം പറഞ്ഞു.