നിലമ്പൂര്‍: ക്ഷേമപെന്‍ഷന്‍ വീടുകളിലെത്തിക്കുന്ന പദ്ധതിക്ക് നിലമ്പൂര്‍ നഗരസഭയില്‍ തുടക്കമായി. ആശുപത്രിക്കുന്നിലെ മാടത്തൊടി മാധവിക്കുട്ടിയമ്മക്ക് വാര്‍ധക്യ പെന്‍ഷന്‍ കൈമാറി പി.വി അന്‍വര്‍ എം.എല്‍.എ ഉദ്ഘാടനം ചെയ്തു. നഗരസഭാ ചെയര്‍പേഴ്‌സണ്‍ പത്മിനി ഗോപിനാഥ് അധ്യക്ഷയായി. നിലമ്പൂര്‍ സര്‍വീസ് സഹകരണബാങ്ക് വഴിയാണ് പെന്‍ഷന്‍ വീടുകളിലെത്തുക.
5,346 പേര്‍ക്കാണ് നഗരസഭാ പരിധിയില്‍ പെന്‍ഷന്‍ ലഭിക്കുക. ഇതില്‍ 2,299 പേര്‍ക്ക് വിതരണം ചെയ്യാനുള്ള തുകയാണ് ബാങ്കിലെത്തിയിട്ടുള്ളത്. കുടിശ്ശിക ഉള്‍പ്പെടെയുള്ള തുകയാണ് വിതരണം ചെയ്യുന്നത്. ബാങ്ക് പ്രസിഡന്റ് അഡ്വ. ബാബു മോഹനകുറുപ്പ് റിപ്പോര്‍ട്ട് അവതരിപ്പിച്ചു. നഗരസഭാ വൈസ് ചെയര്‍മാന്‍ പി.വി ഹംസ, സ്റ്റാന്‍ഡ് കമ്മറ്റി ചെയര്‍മാന്‍മാരായ എ ഗോപിനാഥ്, പാലോളി മെഹബൂബ്, ഷേര്‍ളി മോള്‍, പ്രതിപക്ഷ നേതാവ് എന്‍ വേലുക്കുട്ടി, കൗണ്‍സിലര്‍മാരായ ഗിരീഷ് മോളൂര്‍ മഠത്തില്‍ കൗണ്‍സിലര്‍മാരായ അരുമ ജയകൃഷ്ണന്‍, മുസ്തഫ കളത്തുംപടിക്കല്‍, സമീറ അസീസ്, സി.ഡി.എസ് പ്രസിഡന്റ് ആമിന, സി.പി.എം ഏരിയ സെക്രട്ടറി ഇ പത്മാക്ഷന്‍ പങ്കെടുത്തു. കുടിശ്ശികയടക്കം 4,500 രൂപയാണ് മാധവിക്കുട്ടിയമ്മക്ക് ലഭിച്ചത്.
വാര്‍ധക്യകാല പെന്‍ഷന്‍, വിധവാപെന്‍ഷന്‍, കര്‍ഷക തൊഴിലാളി പെന്‍ഷന്‍, വികലാംഗ പെന്‍ഷന്‍ എന്നിവയാണ് വീടുകളിലെത്തിച്ച് നല്‍കുക.