തലശ്ശേരി: മുഖ്യമന്ത്രി പിണറായി വിജയന് സ്റ്റാലിന്റെ ഭാഷയാണെന്നും സ്റ്റാലിനിസത്തിന്റെ റഷ്യയിലാണോ പിണറായി ജീവിക്കുന്നതെന്നും മുന്‍ കേന്ദ്ര മന്ത്രി മുല്ലപ്പള്ളി രാമചന്ദ്രന്‍. തലശ്ശേരിയില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. ജനകീയ സമരങ്ങള്‍ നടത്തുന്നവരുമായി ഒരുതരത്തിലും ചര്‍ച്ചയില്ലെന്ന് തറപ്പിച്ച് പറയുന്ന മുഖ്യമന്ത്രിയുടെ രീതി അംഗീകരിക്കാന്‍ സാധിക്കില്ല. ഇത് സ്റ്റാലിന്റെ ഭാഷയാണ്. വികസന പദ്ധതികള്‍ നടപ്പാക്കുമ്പോള്‍ ജനകീയ സമരങ്ങളും ഉടലെടുക്കും അതിനെ നയപരമായ രീതിയിലാണ് കൈകാര്യം ചെയ്യേണ്ടത്. നാലുവരി പാതയ്‌ക്കെതിരെയുള്ള സമരത്തില്‍ പാര്‍ട്ടി സെക്രട്ടറിയായിരുന്ന പിണറായി വിജയനായിരുന്നു മുന്‍പന്തിയില്‍. അതിവേഗ റെയില്‍പ്പാതക്കും ഭൂമിക്കടിയിലൂടെ പാചക വാതക കണക്ഷന്‍ നടപ്പാക്കാന്‍ നോക്കിയപ്പോഴും പിണറായിയും പാര്‍ട്ടിയും എതിര്‍ക്കുകയായിരുന്നു. ഇന്ന് മുഖ്യമന്ത്രിയായപ്പോള്‍ അദ്ദേഹത്തിന് മാറ്റം വന്നതായി കാണുന്നതില്‍ സന്തോഷമുണ്ട്. എന്നാല്‍ പരിസ്ഥിതിക്ക് കോട്ടം തട്ടുന്ന രീതിയിലുള്ള വികസന പ്രവര്‍ത്തനം നടപ്പാക്കരുത്. വികസനത്തിന് യോജിച്ച തീരുമാനം കൈക്കൊള്ളുകയാണ് വേണ്ടത്. വരുന്ന അഞ്ച് വര്‍ഷക്കാലം ഭരണം തുടരണമെന്നുണ്ടെങ്കില്‍ ആദ്യം സ്വന്തം ജില്ലയായ കണ്ണൂരില്‍ സമാധാനമുണ്ടാക്കാന്‍ ശ്രമിക്കുകയാണ് പിണറായി വേണ്ടതെന്നും മുല്ലപ്പള്ളി കൂട്ടിച്ചേര്‍ത്തു.