കാബൂള്‍: താലിബാനെ ഒറ്റപ്പെടുത്തുന്ന സമീപനം വിജയിക്കില്ലെന്നും സര്‍ക്കാര്‍ ഉദ്യോഗസ്ഥര്‍ക്കും മറ്റും ഏര്‍പ്പെടുത്തിയ യാത്രാ നിരോധനം നീക്കണമെന്നും ഐക്യരാഷ്ട്ര സഭാ രക്ഷാസമിതി (യു.എന്‍.എസ്.സി) യോട് താലിബാന്‍ സര്‍ക്കാര്‍ ആവശ്യപ്പെട്ടു. ഇപ്പോഴത്തെ സമീപനം അഫ്ഗാനിസ്താനും അവിടുത്തെ ജനങ്ങള്‍ക്കും ഒരു ഗുണവും ചെയ്യില്ലെന്ന് താലിബാന്‍ ഡെപ്യൂട്ടി വക്താവ് ബിലാല്‍ കരിമി പറഞ്ഞു.

മൂന്ന് മാസത്തിലേറെയായിട്ടും താലിബാന്‍ നേതാക്കളുടെ യാത്രാ വിലക്ക് നീക്കാന്‍ യു.എന്‍ സുരക്ഷാ കൗണ്‍സില്‍ തയ്യാറായിട്ടില്ല. ഇതുമായി ബന്ധപ്പെട്ട എല്ലാ ഉപരോധങ്ങളും നീക്കണമെന്നും അഫ്ഗാനും ലോകവും തമ്മിലുള്ള വിടവ് കുറയ്ക്കണമെന്നും ബിലാല്‍ കരിമി അഭ്യര്‍ത്ഥിച്ചു. ഒറ്റപ്പെടുത്തല്‍ നയങ്ങള്‍ വിടവുകള്‍ സൃഷ്ടിക്കുകയും പ്രശ്‌നങ്ങളിലേക്ക് നയിക്കുകയും ചെയ്യുമെന്നതല്ലാതെ ഒരു ഫലവും ഉണ്ടാക്കിയിട്ടില്ലെന്നതാണ് ചരിത്രമെന്നും അദ്ദേഹം ഓര്‍മിപ്പിച്ചു.

അഫ്ഗാനില്‍ സ്ത്രീകളെയും പെണ്‍കുട്ടികളെയും താലിബാന്‍ സര്‍ക്കാര്‍ അടിച്ചമര്‍ത്തുന്നതായി ആരോപിച്ച് സര്‍ക്കാര്‍ ഉദ്യോഗസ്ഥരുടെ യാത്രാ വിലക്ക് തുടരണമെന്ന് സെപ്റ്റംബറില്‍ ഹ്യൂമന്‍ റൈറ്റ്‌സ് വാച്ച് യു.എന്‍.എസ്.സിയോട് ആവശ്യപ്പെട്ടിരുന്നു. അന്താരാഷ്ട്ര സമൂഹത്തിന്റെ ആവശ്യങ്ങള്‍ അഭിസംബോധന ചെയ്യുന്നതില്‍ താലിബാന്‍ പരാജയപ്പെട്ടുന്നാണ് വിമര്‍ശനം. ദോഹ ഉടമ്പടി നടപ്പാക്കുന്നതില്‍ സര്‍ക്കാര്‍ പരാജയപ്പെട്ടത് താലിബാന്‍ ഉദ്യോഗസ്ഥര്‍ക്കുള്ള യാത്രാ വിലക്ക് തുടരുന്നതിന്റെ പ്രധാന കാരണങ്ങളിലൊന്നാണെന്ന് അന്താരാഷ്ട്ര മാധ്യമങ്ങള്‍ ചൂണ്ടിക്കാട്ടുന്നു.