ദുബൈ: പ്രാദേശിക വ്യോമപാതകള്‍ ഭാഗികമായി തുറന്നതിനെത്തുടര്‍ന്ന് എമിറേറ്റ്‌സ് എയര്‍ലൈന്‍ സര്‍വിസുകള്‍ ഘട്ടംഘട്ടമായി പുനഃസ്ഥാപിക്കുന്നു. നിലവില്‍ പരിമിതമായ സര്‍വിസുകളാണ് നടത്തുന്നതെങ്കിലും വരും ദിവസങ്ങളില്‍ ശൃംഖല പൂര്‍ണ്ണതോതില്‍ പ്രവര്‍ത്തനസജ്ജമാക്കാനാണ് എയര്‍ലൈന്‍ ലക്ഷ്യമിടുന്നത്. സുരക്ഷാ മാനദണ്ഡങ്ങള്‍ക്കും വ്യോമപാത ലഭ്യമാകുന്നതിനും അനുസൃതമായി വരുംദിവസങ്ങളില്‍ 100 ശതമാനം സര്‍വിസുകളും പുനരാരംഭിക്കുമെന്ന് അധികൃതര്‍ അറിയിച്ചു.

നേരത്തെ ടിക്കറ്റ് ബുക്ക് ചെയ്ത യാത്രക്കാര്‍ക്കാണ് നിലവില്‍ മുന്‍ഗണന നല്‍കുന്നത്. കണ്‍ഫേം ചെയ്ത ബുക്കിംഗ് ഉള്ളവര്‍ മാത്രമേ വിമാനത്താവളത്തിലേക്ക് പോകാവൂ എന്ന് എമിറേറ്റ്‌സ് നിര്‍ദ്ദേശിച്ചു. യാത്രക്കാര്‍ക്ക് വിമാനങ്ങളുടെ ലഭ്യത പരിശോധിക്കാനും ബുക്ക് ചെയ്യാനും എമിറേറ്റ്‌സിന്റെ ഔദ്യോഗിക വെബ്‌സൈറ്റ് ഉപയോഗിക്കാം.

ALSO READ: ഗൾഫ് സുരക്ഷയിൽ വിട്ടുവീഴ്ചയില്ല; ഇറാന്റെ കടന്നുകയറ്റത്തെ അപലപിച്ച് സഊദി-കുവൈത്ത് കിരീടാവകാശികൾ

കഴിഞ്ഞ ദിവസം ദുബൈയില്‍ നിന്ന് ഏകദേശം 30,000 യാത്രക്കാരെയാണ് എമിറേറ്റ്‌സ് ലക്ഷ്യസ്ഥാനങ്ങളില്‍ എത്തിച്ചത്. ഇന്ന് 83 ലക്ഷ്യസ്ഥാനങ്ങളിലേക്ക് പ്രതിദിനം 106 റിട്ടേണ്‍ സര്‍വിസുകള്‍ നടത്തും. ഇത് എമിറേറ്റ്‌സിന്റെ ആകെ റൂട്ട് ശൃംഖലയുടെ 60 ശതമാനത്തോളം വരും. ഇന്ത്യയിലേക്കുള്ള സര്‍വിസുകളും വന്‍തോതില്‍ വര്‍ധിപ്പിച്ചു. ഇന്ന് മുതല്‍ ഇന്ത്യയിലെ ഒമ്പത് നഗരങ്ങളിലേക്കായി പ്രതിദിനം 22 സര്‍വീസുകള്‍ എമിറേറ്റ്‌സ് നടത്തും.

ഉയര്‍ന്ന ഡിമാന്‍ഡുള്ള ബ്രിട്ടണിലേക്ക് അഞ്ച് വിമാനത്താവളങ്ങളിലായി പ്രതിദിനം 11 സര്‍വിസുകള്‍ നടത്തും. യു.എസിലെ ഏഴ് പ്രധാന നഗരങ്ങളിലേക്കും നിലവില്‍ സര്‍വിസുകള്‍ ലഭ്യമാണ്. സാഹചര്യങ്ങള്‍ സസൂക്ഷ്മം നിരീക്ഷിച്ചുവരികയാണെന്നും മാറ്റങ്ങള്‍ക്കനുസരിച്ച് പ്രവര്‍ത്തനങ്ങളില്‍ ക്രമീകരണം വരുത്തുമെന്നും എയര്‍ലൈന്‍ അറിയിച്ചു. ഏറ്റവും പുതിയ വിവരങ്ങള്‍ക്കായി ഔദ്യോഗിക വെബ്‌സൈറ്റും സോഷ്യല്‍ മീഡിയ പേജുകളും ശ്രദ്ധിക്കാന്‍ യാത്രക്കാരോട് കമ്പനി അഭ്യര്‍ഥിച്ചു.

Emirates Airlines is gradually restoring services as regional airspace partially reopens. The airline aims to fully resume operations in the coming days, prioritizing safety and airspace availability, with 100% services expected soon [1][2].