തിരുവനന്തപുരം: വിഴിഞ്ഞം സമരത്തെ അടിച്ചൊതുക്കാനാണ് സർക്കാറും അദാനിയും ശ്രമിക്കുന്നതെന്ന് ഫാ. യൂജിൻ പെരേര. നഷ്ടം ഈടാക്കുമെന്ന സർക്കാർ നിലപാടിൽ അതിശയമില്ലെന്നും സർക്കാറിന്റെ ഒത്താശയോടെയാണ് ഇന്നലെ നടന്ന സംഭവമെന്നും പെരേര കുറ്റപ്പെടുത്തി. നാട്ടുകാരുമായി പ്രശ്‌നങ്ങളില്ലെന്നു പറഞ്ഞ പെരേര സംഘർഷത്തിന് സർക്കാർ ഒത്താശ ചെയ്യുകയാണെന്നും കൂട്ടിച്ചേർത്തു. ഹൈക്കോടതി ഉത്തരവിനെതിരെ അപ്പീൽ നൽകുമെന്നും പെരേര പറഞ്ഞു.

വിഴിഞ്ഞം സമരക്കാർക്കെതിരെ നിലപാട് കടുപ്പിച്ചിരിക്കുകയാണ് സർക്കാർ. നഷ്ടം ലത്തീൻ അതിരൂപതയിൽ നിന്ന് ഈടാക്കണമെന്നാണ് സർക്കാറിന്റെ നിലപാട്. നിലപാട് ഹൈക്കോടതിയെ അറിയിക്കും. ഇതോടെ സമരക്കാരിൽ നിന്ന് ഈടാക്കാമെന്ന നിർമാണ കമ്പനി വിസിലിന്റെ ആവശ്യം സർക്കാർ അംഗീകരിച്ചു.

വിഴിഞ്ഞം തുറമുഖത്തിനെതിരെ സമരം തുടരുമെന്ന നിലപാടിൽ ഉറച്ചു നിൽക്കുകയാണ് ലത്തീൻ അതിരൂപതയും. ഇന്ന് പള്ളികളിൽ സർക്കുലർ വായിക്കുകയും തുടർ സമരപരിപാടികൾ പ്രഖ്യാപിക്കുകയും ചെയ്യും. വീട് നഷ്ടപ്പെട്ടവരെ തെറ്റിദ്ധരിപ്പിക്കാനുള്ള സർക്കാർ നീക്കം തിരിച്ചറിയണമെന്നും സമരസമിതി പറഞ്ഞു.

വിഴിഞ്ഞത് ഇന്നലെയും സംഘർഷാവസ്ഥയുണ്ടായി. തുറമുഖ നിർമാണം പുനരാരംഭിക്കാനുള്ള അദാനി ഗ്രൂപ്പിന്റെ ശ്രമം തീരവാസികൾ തടഞ്ഞതോടെ വിഴിഞ്ഞം യുദ്ധക്കളമായി മാറുകയായിരുന്നു. പദ്ധതിയെ അനുകൂലിക്കുന്നവരും എതിർക്കുന്നവരും ചേരിതിരിഞ്ഞ് ഏറ്റുമുട്ടി. ശക്തമായ കല്ലേറും ഉണ്ടായി. നിർമ്മാണ സാമഗ്രികളുമായെത്തിയ ലോറി തടഞ്ഞ പ്രതിഷേധക്കാർ വാഹനത്തിന് മുന്നിൽ കിടന്നും പ്രതിഷേധിച്ചു.