ഹാറൂണ്‍ റഷീദ്

ഗ്രൂപ്പ് ഘട്ടത്തിലെ അവസാന മത്സരത്തില്‍ 'ഇ'യില്‍ തീക്കളി. വിജയത്തിനായി കളത്തിലിറങ്ങിയ ടീമുകള്‍ മുഴുവന്‍ മികവും പുറത്തെടുത്തതോടെ 90 മിനുട്ടും, അധിക സമയവും ഗോള്‍മുഖങ്ങള്‍ വിറച്ചു. സ്‌പെയിനിനെ അട്ടിമറിച്ച് ജപ്പാന്‍ ഗ്രൂപ്പില്‍ വീണ്ടും ഏഷ്യന്‍ ശക്തി തെളിയിച്ചതോടെ ഗ്രൂപ്പ് ചാമ്പന്‍മാരായി അടുത്ത റൗണ്ടിലേക്ക് മാര്‍ച്ച് ചെയ്തു. കോസ്‌റ്റോറിക്കയെ രണ്ടിനെതിരെ നാല് ഗോളുകള്‍ക്ക് തകര്‍ത്ത് ജര്‍മനി ആദ്യ വിജയം കരസ്ഥമാക്കിയത് സ്‌പെയിനിന് രണ്ടാം റൗണ്ടിലേക്കുള്ള വഴി തെളിച്ചു. ഒരു ഘട്ടത്തില്‍ കോസ്‌റ്റോറിക്ക ഒന്നിനെതിരെ രണ്ട് ഗോളുകള്‍ക്ക് ലീഡെടുത്തത് സ്‌പെയിനിന്റെ ഭാവിയും അനിശ്ചിതത്വത്തിലാക്കിയെങ്കിലും തുടര്‍ച്ചയായി രണ്ട് ഗോളുകള്‍ നേടി മത്സരത്തിലേക്ക് തിരിച്ചുവന്ന് സ്‌പെയിനിന്റെ വഴിയിലെ അപകടമൊഴുവാക്കി ജര്‍മ്മനി.

68ാം മിനുട്ടിന് ശേഷം തുടരെത്തുടരെ ഗോളുകള്‍ നേടി കളിയിലേക്ക് തിരിച്ച് വന്നെങ്കിലും നാലുഗോളില്‍ മത്സരം അവസാനിച്ചു. ഇതോടെ മരണക്കളിക്ക് അവസാനമായി. ഗ്രൂപ്പിലെ വമ്പന്‍മാരെന്ന് കരുതിയ ജര്‍മ്മനിയെയും സ്‌പെയിനിനെയും ഒന്നിനെതിരെ രണ്ട് ഗോളുകള്‍ക്ക് തകര്‍ത്ത് രാജകീയമായാണ് സാമുറായികളുടെ പ്രീക്വാര്‍ട്ടര്‍ പ്രവേശം. മത്സരത്തിന്റെ 11ാം മിനുട്ടില്‍ മൊറാട്ടയുടെ ഗോളിലൂടെ മുന്നിലെത്തിയ സ്‌പെയിനിനെ 48, 51 മിനുട്ടുകളിലെ ഗോളുകളിലൂടെയാണ് ജപ്പാന്‍ മറികടന്നത്. റിറ്റ്‌സു ഡോ, തനാക എന്നിവരായിരുന്നു ജപ്പാന്റെ ഗോള്‍വേട്ടക്കാര്‍. ജര്‍മനിക്കായി 10ാം മിനുട്ടില്‍ ഗ്നാബ്രി വലകുലുക്കി. പിന്നാലെ 58, 70 മിനുട്ടുകളില്‍ തിരിച്ചടിച്ച് കോസ്‌റ്റോറിക്ക കളിയില്‍ തിരിച്ചെത്തി പ്രീക്വാര്‍ട്ടര്‍ പ്രതീക്ഷ നിലനിര്‍ത്തി. തെജാഡ, വാര്‍ഗസു എന്നവരായിരുന്നു സ്‌കോറര്‍മാര്‍. എന്നാല്‍ തൊട്ടടുത്ത മിനുട്ടുകളില്‍ ഗോളുകള്‍ നേടി ജര്‍മനി തിരച്ചടിച്ചു. ഹാര്‍വസ്റ്റ് 73, 85 മിനുട്ടുകളിലും ഫള്‍ക്രഗ് 89ാം മിനുട്ടിലും ഗോള്‍ നേടി ജര്‍മനിക്ക് പ്രതീക്ഷ നല്‍കിയെങ്കിലും ഗോള്‍ മാര്‍ജിന്‍ അവര്‍ക്ക് തിരിച്ചടിയായി. ആദ്യ മത്സരത്തില്‍ മൊറോക്കോ കാനഡയെ 2-1ന് തോല്‍പ്പിച്ചപ്പോള്‍ ക്രൊയേഷ്യ-ബെല്‍ജിയം മത്സരം സമനിലയിലായിരുന്നു. പ്രീക്വാര്‍ട്ടറില്‍ ജപ്പാന്‍-കൊയേഷ്യയെയും സ്‌പെയിന്‍ മൊറോക്കെയെയും നേരിടും.