മംഗളൂരു: മുന്‍ കേന്ദ്ര മന്ത്രിയും മുതിര്‍ന്ന കോണ്‍ഗ്രസ് നേതാവുമായ ഡോ.ഓസ്‌കാര്‍ ഫെര്‍ണാണ്ടസ് അന്തരിച്ചു. മംഗളൂരുവിലെ ആശുപത്രിയിലായിരുന്നു അന്ത്യം. 18 വര്‍ഷം ഉഡുപ്പിയിലെ എം.പിയായിരുന്നു. കഴിഞ്ഞ മാസം മംഗളൂരു അത്താവറിലെ ഫ്‌ളാറ്റില്‍ യോഗ ചെയ്യുന്നതിനിടെയായിരുന്നു അപകടം.

വീഴ്ചയില്‍ തലയിടിച്ച് തലയില്‍ രക്തം കട്ടപിടിച്ച അദ്ദേഹം അബോധാവസ്ഥയില്‍ തുടരുകയായിരുന്നു. ഗാന്ധി കുടുംബത്തിന്റെ വിശ്വസ്ഥനായിരുന്ന അദ്ദേഹം എ.ഐ.സി.സി ജനറല്‍ സെക്രട്ടറിയായും പ്രവര്‍ത്തിച്ചിരുന്നു. ഒന്നാം യു.പി.എ സര്‍ക്കാരില്‍ അംഗമായിരുന്നു.

രാവിലെ വീണെങ്കിലും കാര്യമായ പ്രശ്നങ്ങളൊന്നും ഉണ്ടായിരുന്നില്ല. വൈകിട്ട് പതിവു വൈദ്യപരിശോധനയ്ക്കായി ആശുപത്രിയില്‍ എത്തിയപ്പോഴാണ് വീഴ്ചയില്‍ സാരമായ പരുക്കേറ്റ് തലയില്‍ രക്തം കട്ട പിടിച്ചെന്നു മനസിലായത്. ഇതിനു പിന്നാലെ അബോധാവസ്ഥയില്‍ ആയി.