കൊച്ചി: പി.വി ശ്രീനിജന്‍ എം.എല്‍.എ തനിക്കെതിരെ ഉന്നയിച്ച ആരോപണത്തിനെതിരായി കിറ്റെക്‌സ് തലവന്‍ സാബു എം. ജേക്കബ് നല്‍കിയ ഹരജി പരിഗണിക്കുന്നതില്‍ നിന്ന് ജസ്റ്റിസ് എം ബദറുദ്ദീന്‍ പിന്‍മാറി. എഫ്.ഐ.ആര്‍ റദ്ദാക്കണമെന്നാവശ്യപ്പെട്ടാണ് സാബു എം ജേക്കബ് അടക്കം 6 പേര്‍ ഹൈക്കോടതിയെ സമീപിച്ചത്. കേസ് ഇന്ന് പരിഗണിച്ചപ്പോള്‍ പിന്‍മാറുകയാണെന്ന് ജഡ്ജ് അറിയിച്ചു.

കേസ് മറ്റൊരു ബെഞ്ച് ഇന്ന് തന്നെ പരിഗണിക്കുമെന്ന് ഹൈക്കോടതി അറിയിച്ചു.

ആഗസ്ത് 17ന് ഐക്കരനാട് കൃഷിഭവന്‍ സംഘടിപ്പിച്ച കര്‍ഷക ദിനാഘോഷത്തില്‍ എംഎല്‍എ ഉദ്ഘാടകനായെത്തിയപ്പോള്‍ പഞ്ചായത്ത് പ്രസിഡന്റും ട്വിന്റി- 20 അംഗങ്ങളായ ജനപ്രതിനിധികളും വേദിവിട്ടിറങ്ങിയ സംഭവം ജാതീയമായ അപമാനിക്കലാണെന്നു കാണിച്ചാണ് ശ്രീനിജന്‍ എംഎല്‍എ പരാതി നല്‍കിയത്. സംവരണമണ്ഡലത്തിലെ എംഎല്‍എ ആയ തന്നെ ജാതീയമായി അധിക്ഷേപിച്ചു. സാമൂഹിക വിലക്കാണ് തനിക്കെതിരേ ഉണ്ടായതെന്ന് പി വി ശ്രീനിജന്‍ പറഞ്ഞു. താന്‍ പങ്കെടുക്കുന്ന വേദികളില്‍നിന്ന് അദ്ദേഹത്തിന്റെ പഞ്ചായത്ത് അംഗങ്ങളെ വിലക്കുമെന്ന് സാബു എം ജേക്കബ് നേരത്തേ പറഞ്ഞിട്ടുണ്ട്. തന്നെ മുറിയില്‍ പൂട്ടിയിടണമെന്നു സാബു പറഞ്ഞതായും എംഎല്‍എയുടെ പരാതിയിലുണ്ട്.

pv sreenijan case highcourt judge withdraws from considering the case