എങ്ങും മൃതദേഹങ്ങളും നിലവിളിയും, 179 മൃതദേഹങ്ങള്‍ ഒരു കുഴിയിലിട്ട് മൂടി; ദുരന്ത കേന്ദ്രമായി ഗസ്സയിലെ അല്‍ ഷിഫ ആശുപത്രി

ഗസ്സ: ഫലസ്തീനില്‍ ഇസ്‌റാഈലിന്റെ നരനായാട്ട് 40 ാംദിവസത്തിലേക്ക് എത്തിയതോടെ, പറഞ്ഞറിയിക്കാന്‍ കഴിയാത്തവിധം ദുരന്തഭൂമിയായി ഗസ്സയിലെ ഏറ്റവും വലിയ ആശുപത്രികളിലൊന്നായ അല്‍ ഷിഫ. എവിടെ നോക്കിയാലും മൃതദേഹങ്ങള്‍ കൂട്ടിയിട്ടിരിക്കുന്ന അവസ്ഥയാണ് ദിവസങ്ങള്‍ക്ക് മുമ്പ് വരെ ഗസ്സയിലെ ഏറ്റവും വലിയ ആരോഗ്യസംവിധാനമായിരുന്ന അല്‍ ഷിഫയില്‍. മോര്‍ച്ചറിക്ക് പുറത്തും ഒഴിഞ്ഞ ഭാഗങ്ങളിലും തറയിലുമെല്ലാം അടക്കംചെയ്യാനായി വെള്ള കോട്ടണ്‍ തുണികളില്‍ പൊതിഞ്ഞ മൃതദേഹങ്ങളുടെ ചിത്രങ്ങള്‍ ഫലസ്തീന്‍ ആക്ടിവിസ്റ്റുകള്‍ പുറത്തുവിട്ടു. പുതപ്പുകളും മറ്റ് തുണികളും കൊണ്ട് പൊതിഞ്ഞ മൃതദേഹങ്ങളും ചിത്രങ്ങളില്‍ കാണാം.

ഗസ്സ സിറ്റിയിലെ ഖബര്‍സ്ഥാനുകള്‍ നിറഞ്ഞുകവിഞ്ഞതിനാല്‍ പുതിയ കുഴികള്‍ വെട്ടാനുള്ള കാലതമാസവും, മോര്‍ച്ചറി നിറഞ്ഞ് കവിഞ്ഞതുമാണ് ഇവ പുറത്തുവയ്ക്കാന്‍ കാരണം. ശീതീകരണ സൗകര്യമില്ലാത്തതിനാല്‍ പല മൃതദേഹങ്ങളും അഴുകി തുടങ്ങുകയുംചെയ്തു. അല്‍ഷിഫ കോംപ്ലക്‌സിനുള്ളില്‍ വലിയ കുഴിയില്‍ ഒറ്റയടിക്ക് 179 പേരെ മറവുചെയ്തു. ഇതില്‍ ചില മൃതശരീരങ്ങളില്‍ അഴുകിത്തുടങ്ങിയിരുന്നു. ഇതില്‍ നവജാതശിശുക്കളുടെ മൃതദേഹവും ഉള്‍പ്പെടും.

കഴിഞ്ഞമാസം ഏഴിന് ഇസ്‌റാഈല്‍ ആക്രമണം തുടങ്ങിയ ശേഷം ഗസ്സയില്‍നിന്ന് വന്ന ഏറ്റവും ഭീകരവും കരളലിയിപ്പിക്കുന്നതുമായ ദൃശ്യങ്ങളിലൊന്നാണിതെന്ന് ചിത്രം പങ്കുവച്ച് തുര്‍ക്കി വാര്‍ത്താ ഏജന്‍സി അനദ്‌ലൂ പറഞ്ഞു. ആശുപത്രിക്ക് ചുറ്റും ഇസ്‌റാഈലി ടാങ്കുകള്‍ നിലയുറപ്പിച്ചതിനാല്‍ ആശുപത്രിയില്‍നിന്ന് പുറത്തിറങ്ങാന്‍ കഴിയാത്ത സാഹചര്യമാണുള്ളത്. 700 ഓളം രോഗികളും ഏഴായിരത്തോളം അഭയാര്‍ഥികളും ഇവിടെയുണ്ട്. വൈദ്യുതിയും മെഡിക്കല്‍ ഉപകരണങ്ങളും ഇല്ലാത്തത് മൂലം 24 മണിക്കൂറിനുള്ളില്‍ രണ്ട് നവജാത ശിശുക്കളടക്കം 12 പേരാണ് ഇവിടെ കൊല്ലപ്പെട്ടത്.

മൃതദേഹങ്ങള്‍ തെരുവുനായകള്‍ കടിച്ചുകീറുന്നു

ഗസ്സ: അല്‍ഷിഫ ആശുപത്രിയില്‍ മൃതദേഹങ്ങള്‍ തെരുവുനായ്ക്കള്‍ ഭക്ഷിക്കുന്നതായുള്ള റിപ്പോര്‍ട്ടുകളും പുറത്തുവന്നു. ആശുപത്രിയുടെ മോര്‍ച്ചറിയിലെ അസൗകര്യംമൂലം പുറത്തുവച്ച മൃതദേഹങ്ങളാണ് തെരുവുനായകള്‍ കടിച്ചുകീറിയത്. ദുരന്തസമാനമാണ് അവസ്ഥയെന്നും മൃതദേഹങ്ങള്‍ക്ക് പോലും മതിയായ ആദരവ് നല്‍കാന്‍ കഴിയുന്നില്ലെന്നും ഫലസ്തീന്‍ അതോരിറ്റി ആരോഗ്യമന്ത്രി മയി അള്‍ ഖൈല പറഞ്ഞു.