കോഴിക്കോട്: ഐ.എന്‍.എല്ലില്‍നിന്ന് രാജിവച്ച് നാഷനല്‍ സെക്കുലര്‍ കോണ്‍ഫറന്‍സി(എന്‍.എസ്.സി)നെ പുനരുജ്ജീവിപ്പിക്കുമെന്ന് നേതാക്കള്‍. ഐ.എന്‍.എല്ലുമായുള്ള ലയനത്തില്‍നിന്ന് പിന്മാറുകയാണെന്നും എന്‍.എസ്.സി മുന്‍ സംസ്ഥാന ജനറല്‍ സെക്രട്ടറി എം.എ ജലീല്‍ പുനലൂര്‍ വാര്‍ത്താസമ്മേളനത്തില്‍ അറിയിച്ചു. 

ഗ്രൂപ്പും തമ്മിലടിയും തുടരുന്ന ഐ.എന്‍.എല്ലുമായി യോജിച്ചുപോകാനാവില്ല. പാര്‍ട്ടിയുടെ ഒരു വിഭാഗം അധികാര രാഷ്ട്രീയത്തിന് അടിപ്പെട്ടു. ഇരുവിഭാഗങ്ങളും ഒത്തുതീര്‍പ്പിലെത്തിയെങ്കിലും ഭിന്നത തുടരുകയാണ്. ഇടതുമുന്നണിക്കും പ്രവര്‍ത്തകര്‍ക്കും ഐ.എന്‍.എല്‍ അപമാനമായിരിക്കുകയാണെന്നും നേതാക്കള്‍ ആരോപിച്ചു. 

2019 മാര്‍ച്ചിലാണ് നാഷനല്‍ സെക്കുലര്‍ കോണ്‍ഫറന്‍സിലെ നേതാക്കള്‍ ഐ.എന്‍.എല്ലില്‍ ചേക്കേറിയത്. 

എന്നാല്‍ പാര്‍ട്ടിയുടെ സംസ്ഥാന പ്രസിഡന്റ് പി.ടി.എ റഹീം എം.എല്‍.എ  ഐ.എന്‍.എല്ലില്‍ ഇടതു സ്വതന്ത്രനായാണ് കുന്ദമംഗലത്ത് മത്സരിച്ചത്. 

പാര്‍ട്ടി പുനരുജ്ജീവിപ്പിക്കാനുള്ള നീക്കത്തിന് റഹീമിന്റെ എല്ലാ ആശീര്‍വാദങ്ങളുമുണ്ടാകുമെന്നും നേതാക്കള്‍ പറഞ്ഞു. സംസ്ഥാന സെക്രട്ടേറിയറ്റംഗങ്ങളായ ഇ.സി മുഹമ്മദ്, സിറാജ് പെരിനാട്, നിയാസ് കരിമുകില്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.