വൈക്കം: അപകടത്തില്‍ പരുക്കേറ്റ്  നടുറോഡില്‍ രക്തം വാര്‍ന്നുകിടന്ന യുവാക്കളെ വൈക്കം എം.എല്‍.എ സി.കെ ആശ സ്വന്തം വാഹനത്തില്‍ മെഡിക്കല്‍ കോളജ് ആശുപത്രിയില്‍ എത്തിച്ചു.
ഇന്നലെ രാവിലെയാണ് സംഭവം. തലയാഴം കല്ലറ വഴിയില്‍ നാണുപ്പറമ്പ് ഭാഗത്ത് നിര്‍ത്തിയിട്ടിരുന്ന സെയില്‍സ് വാനില്‍നിന്നും പുറത്തേക്കിറങ്ങിയ ഡ്രൈവര്‍ നീണ്ടൂര്‍ കൊച്ചുമല്ലശേരില്‍ ശരത് (24), നീണ്ടൂര്‍ പേന്തുരുത്തുമാലില്‍ ഫിറോസ് (24) എന്നിവരെ കാര്‍ ഇടിച്ചുവീഴ്ത്തുകയായിരുന്നു. നിയന്ത്രണം വിട്ട കാര്‍ വാനില്‍ ഇടിച്ചുനിന്നു. കല്ലറയില്‍ മരണവീട്ടിലേക്കുള്ള യാത്രാമധ്യേ ഇതുവഴിവന്ന ആശ രക്തംവാര്‍ന്ന് വഴിയില്‍കിടന്ന യുവാക്കളെ തന്റെ വാഹനത്തില്‍ കയറ്റി മെഡിക്കല്‍ കോളജിലെത്തിക്കുകയായിരുന്നു. മറ്റൊരു വാഹനത്തില്‍ എം.എല്‍.എ ഇവരെ പിന്‍തുടര്‍ന്നു മെഡിക്കല്‍ കോളജിലെത്തി ചികിത്സാ സംവിധാനങ്ങളുറപ്പാക്കി. യുവാക്കളില്‍ ഒരാള്‍ ഗുരുതരാവസ്ഥയിലാണ്.