കോഴിക്കോട്: എഴുത്തുകാരന്‍ സിവിക് ചന്ദ്രന്‍ എഡിറ്റ് ചെയ്ത ലേഖന സമാഹാരം 'പലരാമായണങ്ങള്‍ പലവായനകള്‍' പ്രകാശനം ചെയ്തു. കോഴിക്കോട് അളകാപുരി ഓഡിറ്റോറിയത്തില്‍ നടന്ന ചടങ്ങില്‍ ചരിത്രകാരന്‍ എം.ജി.എസ് നാരായണന്‍ സംസ്ഥാന സാഹിത്യ അക്കാദമി വൈസ് ചെയര്‍പേഴ്‌സന്‍ ഖദീജാ മുംതാസിന് പുസ്തകം കൈമാറി. കല്‍പ്പറ്റ നാരായണന്‍, കെ.ഇ.എന്‍ കുഞ്ഞഹമ്മദ്, ഫാ. ബോബി കപ്പുച്ചിന്‍, സാറാ ജോസഫ് തുടങ്ങിയവരുടെ ലേഖനങ്ങളാണ് പുസ്തകത്തില്‍ ഉള്‍ക്കൊള്ളിച്ചിരിക്കുന്നത്.
സ്‌പെല്‍ ബുക്‌സാണ് പുസ്തകത്തിന്റെ പ്രസാധകര്‍. ചടങ്ങിനോടനുബന്ധിച്ച് സാമൂഹ്യപ്രവര്‍ത്തകന്‍ വിജയരാഘവന്‍ ചേലിയ 'ഇറോം ഷര്‍മിളയുടെ സമരസാചര്യങ്ങളും സമൂഹത്തിന്റെ മനോഭാവവും' വിഷയത്തില്‍ പ്രഭാഷണം നടത്തി. എ.പി കുഞ്ഞാമു മഹാശ്വേതാ ദേവിയെ അനുസ്മരിച്ചു. സിവിക് ചന്ദ്രന്‍ അധ്യക്ഷനായ ചടങ്ങില്‍ സ്‌പെല്‍ ബുക്‌സ് പ്രസാധകന്‍ എം. മനോഹരന്‍ സ്വാഗതവും അനില്‍കുമാര്‍ തിരുവത്ത് നന്ദിയും പറഞ്ഞു.