കല്‍പ്പറ്റ: ആരോഗ്യമാതാ ദേവാലയം മുണ്ടേരിയിലെ 22ാമത് തിരുനാള്‍ മഹോത്സവം സെപ്തംബര്‍ ഒന്നു മുതല്‍ എട്ട് വരെ വിവിധ പരിപാടികളോടെ ആഘോഷിക്കും. തിരുനാളിനോട് അനുബന്ധിച്ച് ദേവാലയത്തില്‍ വിശുദ്ധ അന്തോണീസ് പുണ്യാളന്റെ തിരുശേഷിപ്പ് പ്രതിഷ്ഠ നടക്കും.
റോമില്‍ നിന്ന് കൊണ്ടുവരുന്ന തിരുശേഷിപ്പ് സെപ്തംബര്‍ നാലിന് വൈകിട്ട് 4.30ന് കോഴിക്കോട് രൂപത മെത്രാന്‍ ഡോ. വര്‍ഗീസ് ചക്കാലക്കല്‍ പ്രതിഷ്ഠിക്കും. കല്‍പ്പറ്റ തിരുഹൃദയ ദേവാലയത്തില്‍ നിന്നും വിശ്വാസികളുടെ അകമ്പടിയോടെ പ്രദക്ഷിണമായാണ് മുണ്ടേരി ദേവാലയത്തില്‍ തിരുശേഷിപ്പ് എത്തിക്കുന്നത്. ദേവാലയത്തിലെ പ്രധാന ചടങ്ങായ തലമുണ്ഡന അടിമ നേര്‍ച്ച ഇന്ന് കാലത്ത് 10.45ന് നടക്കും.
29 മുതല്‍ എട്ടുവരെ വൈകിട്ട് അഞ്ച് മുതല്‍ ദേവാലയത്തില്‍ വിവിധ പരിപാടികള്‍ സംഘടിപ്പിച്ചിട്ടുണ്ട്. സെപ്തംബര്‍ ഒന്‍പതിന് കാലത്ത് 6.30ന് നടക്കുന്ന ദിവ്യബലിയോടെ മഹോത്സവത്തിന് സമാപനമാകും. എല്ലാ ചൊവ്വാഴ്ചയും വൈകിട്ട് 5.30ന് നൊവേനയും, ദിവ്യബലിയും ഉണ്ടാകുമെന്ന് ഫാ. ബെന്നി കെ.ആര്‍, പാരിഷ് കൗണ്‍സില്‍ സെക്രട്ടറി ജോയി കയ്യാലപ്പറമ്പില്‍, ഷിജു ടി.ടി വാര്‍ത്താസമ്മേളനത്തില്‍ അറിയിച്ചു.