കോഴിക്കോട് ലോ കോളജിലെ സംഘര്‍ഷം; കെ.എസ്.യു പ്രവര്‍ത്തകനെ മര്‍ദ്ദിച്ച എസ്.എഫ്.ഐ പ്രവര്‍ത്തകര്‍ക്കെതിരെ കേസ്

കോഴിക്കോട്: കോഴിക്കോട് ലോ കോളേജിലെ സംഘര്‍ഷത്തില്‍ കേസെടുത്ത് പൊലീസ്. കെഎസ്!യു പ്രവര്‍ത്തകനെ മര്‍ദിച്ച 6 എസ്എഫ്‌ഐ പ്രവര്‍ത്തകര്‍ക്കെതിരെ ചേവായൂര്‍ പൊലീസാണ് കേസെടുത്തത്. ശ്യാം കാര്‍ത്തിക്, റിത്തിക്, അബിന്‍രാജ്, ഇനോഷ്, ഇസ്മായില്‍, യോഗേഷ് എന്നിവരാണ് പ്രതികള്‍. വധശ്രമം, സംഘം ചേര്‍ന്ന് മര്‍ദ്ദിക്കല്‍ തുടങ്ങിയ ജാമ്യമില്ലാ വകുപ്പുകള്‍ ചുമത്തിയാണ് കേസ്.

സംഭവത്തില്‍ പ്രതിഷേധിച്ച് ഇന്ന് കോളജില്‍ കെ.എസ്.യു യൂണിറ്റ് കമ്മിറ്റി വിദ്യാഭ്യാസ ബന്ദിന് ആഹ്വാനം ചെയ്തു.

ഇന്നലെ രാവിലെ പതിനൊന്ന് മണിയോടെയായിരുന്നു സംഭവം. ക്ലാസിലിരിക്കുകയായിരുന്ന സഞ്ജയോട് ഒരു കാര്യം പറയാനുണ്ടെന്ന് പറഞ്ഞ് വിളിച്ചിറക്കി കൂട്ടത്തോടെ ആക്രമിക്കുകയായിരുന്നു. കൈയ്ക്കും തലയ്ക്കും പരുക്കേറ്റ സഞ്ജയ് മെഡിക്കല്‍ കോളജ് ആശുപത്രിയില്‍ ചികിത്സ തേടിയിരുന്നു.